---

Abante:
pagpili OIC GM dai pakiaraman politico


HAGAD kan mga miembros kan junta directiva kan Camarines Sur II Electric Cooperative (Casureco II) na dai paki-araman an manijamiento nin politico sa pagpili kan matukaw na OIC General Manager poon sa Mayo 1, 2005, karibay ni GM Antonio Borja na nakatalaan na magvacacion nin duwang bulan sa Estados Unidos de America.

Ini an apelo ni dating Judge asin director Joseph Abante kan distrito nin Canaman mientras na sainda nang pig-eendorsar iyo si Engr. Rodel Pasumbal kan Engineering Department. An resolucion kan junta aaprovaran pa kan National Electrification Administration (NEA).

Saindang napili si Pasumbal huli ta igwang kabatiran sa mga problema tecnical kan cooperativa asin mahigos sa servicio.

Kabali sa mga na-ngaranan na asperante iyo sinda, ISD Chief Rolando Pante, Finance Manager Jane Barrameda asin area manager Betty Aguilar kan distrito nin Canaman.

Pigbuyagyag ni Abante na igwa nang nagkakamang na politico nganing paki-araman an pagbugtak sana nin OIC General Manager na dapat ipaubaya na ini sa manijamiento nganing dai magka-igwa nin mga problema. Habo naman ngaranan kan director kun siisay na politico sa provincia an mawot makiaram sa saindang trabajo.

An ibang miembros kan junta directiva an nagpahayag nin pagduda na bako lang duwang bulan an vacacion ni Engr. Borja envez puedeng maglawig mientras na pig-aadalan kun dagos nang maretiro sa servicio. An mavacion na GM an nagsayuma mag-confirmar kan informacion na ini hali sa nagkaperang director.
Sa pag-vacacion ni Borja, saiyang babayadan an cooperativa na nagbagsak na sa category E hali sa dating category D kaya ngani digdi nagdududa an ibang mga director.

Nagpaparababa an collection efficiency kan cooperativa huli ta dakul na mga establisimiento commercial an dai nakakabayad sa tamang panahon kan saindang mga obligacion sa electric bill.

Sa apat na mga candidatong OIC GM sinda, Barrameda, Aguilar asin Pante gabos naging OIC GM kun nahali si Borja nin harahalawig na mga panahon afuera ki Pasumbal na premiro pa sana kun ma-aprovaran kan NEA.