---

Casureco 3 dinaog sa labor case


34 empleyados pinababalik sa trabjo, pigsugo bayadan P1.7-M

AN National Labor Relation Commission (NLRC) nagpaluwas nang decicion na bayadan nin P1.7 milliones an 34ng mga empleados kan Camarines Sur III Electric Cooperative (Casureco III) sa Ciudad nin Iriga huli sa casong illegal dismissal na pigplantiar ni Josue C. Herras, EL Al, sa oficina ni Executive Labor Arbiter Rolando Bobis.

An Casureco III pigsusugo na bayadan nin P50,000 cada empleados bilang moral and exemplary damages dai pa kabali si separation pay asin back wages with damages sa enot na decicion ni Bobis kan Octubre 31, 2000.

Pig-apelar kan manijamiento kan Casureco III sa Commission an Labor Case sa enot na decicion kan NLRC kan Octubre 31, 2000 mas nadagdagan an saindang obligacion sagcod na pigsusugo na magbayad kan moral and exemplary damages sa mga hinaraling empleados sagcod nang pigsusugo na ibaralik sa dati nindang puesto.

Si Atty. Nelson Legacion, an counsel kan mga nagrereclamong empleados an nagplantiar na nin writ of execution tanganing huroton an respondiente na magbayag na kan moral and exemplary damages.

Ginibo na an paghaharampangan kasoodmang hapon sa oficina ni Bobis.

Nagpaluwas tolos nin Writ of Execution si Bobis para sa pagpabalik kan mga nagreclamong mga empleados mantang matalaan nin execution conference sa oficina kan NLRC.

An labor case contra sa sinambit na cooperativa nin corriente nangyari kan iimplementar ni dating Project Supervisor/AGM Engr. Magdaleno Dante Ypil an retrenchment program kan Febrero 2000 huli sa dahilan na sobrado na an mga empleados sagcod nang iyo an nagiging causa kan pagkalugi. Inaprovaran kan oficina central kan National Electrification Administration, alagad dai man ini naging base legal nganing siripaon sa puesto an mga pobreng empleados na haloy nang nagseservi sa cooperativa.

An pagtukaw kan mga Project Supervisor/AGM gikan sa oficina kan NEA saro pa sa naging controvercia kan mga nakaaging taon huli ta iyo man sana an naghuhuthot kan fondo kan cooperativa sagcod nang nagkakaralugi, sabi mismo sa sombong nin mga empleados dai pa pigsasangat an sinambit na labor case.
Sagcod sa ngonian dakula an obligacion sa mga separation pay, back wages asin moral and exemplary damages sa mga empleados, alagad igwa pang milliones pesos na morosidad sa power bill kan National Power Corporation.