5-mil matatawan trabaho kan Konka
PARACALE, Camarines Norte - Maabot sa cienco mil na residentes kan
provincia nin Camarines Norte an matatawan nin trabajo kan Konka
Fulim Mining and Development Corporation sa pinaka-enot na
pagbukas kan pagmimina nin batbat sa Brgy. Pinagbirayan-Malaki sa
banwaan na ini matapos magsikad na an operacion kan Iron Ore
Processing Plant.
Si President Gloria Macapagal-Arroyo iyo mismo an naging juespe de
honor sa ginibong pagbasbas kan Mining Corporation kan Abril 18
kaibahan si DENR Secretary Mike Defensor asin iba pang mga
miembros kan gabinete na mainit man na pigsabat ninda Gobernador
Jesus Typoco, Jr., Congresista Renato Unico Jr. asin Alcalde Edgar
Alcala kan Paracale.
Pinahayag ni Alexander Fu Kong Sang, chairman kan junta kan Konka
Fulim Mining an pagmimina kan batbat sa Filipinas may initial
investment na $30 milliones. An Royalty Tax Distribution sa LGU
pagbabarangaon an 20 por ciento para sa gobierno provincial
(P23.9-M), sa gobierno municipal 45 por ciento (P53.8-M) mientras
sa sinambit na barangay maabot sa 35 por ciento (P41.9-M).
Nadiscubre pa kan Konka na sa provincia nin Camarines Norte,
limang barangay an may inaapod na Geological Iron Ore Deposit, an
barangay Nakalaya, Jose Panganiban pigkakarkulo sa 65 million
tons, sa brgy. Capacuan, Paracale 10 million tons, brgy. Larap,
Jose Panganiban 20 million tons, brgy. Binit, Napaod asin Dalas sa
banwaan kan Labo igwang 15 million tons mientras na maabot sa 100
million tons sa brgy. Agusan asin Pinagbirayan-Malaki, Paracale,
na sa kagabsan nasa 210 ore deposit asin ini maglalawig nin sagcod
sa 70 anyos na mining operation.
Afuera kan pagmimina nin batbat, an Paracale bantugan sa pagmina
nin bulawan. Si Alcalde Alcala nagsabi na dakulang tabang sa
saiyang kahimanwa ta dakul an matatawan nin trabajo. (Francis
Elevado)
