Aguilar, OIC kan Casureco 2
SI Ms. Betty
Aguilar, pigdesignar na ni General Manager Antonio Borja bilang
OIC GM sa tahaw kan dai pa makadecicion an junta directiva kun
siisay an saindang irerecomendar sa National Electrification
Administration (NEA) na magtukaw OIC mientras na si Borja yaon sa
duwang bulan an pagvacacion sa Estados Unidos de America na ma-efecto
sa Mayo 1, 2005.
An junta directiva sa pamamayo ni Board President Ramon Borja
nagtalaan pa sanang magdecicion ngonian na semana kun siisay an
saindang pipilion sa mga pigrecomendar ni Borja na kinababalihan
ninda Finance Manager Jane Barrameda, ISD Manager Rolanto Pante,
Engr. Rodel Pasumbal asin Betty Aguilar.
Si Borja, an yaon ngonian sa Manila sa pagproceso kan saiyang mga
papeles sa pagviaje pasiring sa USA asin saiyang pigdesignar si
Aguilar na OIC sagcod na dai pa nakakapili an junta.
Sa mga asperanteng OIC GM an magabat na pigpipilian kan junta
directiva iyo sinda Aguilar asin Barrameda.
An arin man na mapipili kan junta an approvaran pa kan NEA para sa
confirmacion nganing iyo an magtukaw na OCI GM.
Mientras tanto, si director Joseph Abante kan distrito kan Canaman,
nagpahayag nin pagduda na posibleng dagos nang maghelig sa puesto
si Borja huli ta an saiyang familia an yaon na nag-eestar sa USA.
Kaya ngani an junta an busising pig-aadalan kun siisay an dapat na
maging OIC GM sa pag-andam kun dagos nang maretiro sa servicio an
mavacacion na GM.
Alagad sa paliwanag man ni Borja, sinabi kaini na mabalik paman
siya pakatapos kan duwang bulan na vacacion, dai man giraray
hinahali an posibilidad na magtenir sa Estados Unidos kun igwa nin
malalaogan na trabajo.
