Kan naka aguing isyu kan periodicaong ine kan BICOL MAIL sinabi na kan tagasurat kan colom na ine na sa sasanglean na niya an ngaran kan colom pagkatapos na haros naobos na niya man matokar an mga tema tungkol sa “Total Waste Management System lalo na digde sa Siyudad nin Naga. Alagad napag isipan kan tagasurat kan colom na ine na dai na seguro total na sasanglean an titulo kan colom kundi idadagdag na lang an bago niyang campanya sa pagsirbe sa Kapalibotan guican sa mga miembros kan sarong organisasyon, an KNIGHTS OF RIZAL na igua man nin mahiwas na pagmakolog para sa Kapalibotan asin an autor kan colom na ine iyo man an halawig nang pamayo kan sinabi nang Organisasyon,. An Knights of Rizal, Naga City Chapter.. An magigin titulo na kan Colom arog na kaine: ATAMANON AN KAPALIBOTAN, AN RIZALISMO KATABANG TA DIYAN.

Sa isyu ngonian na semana kaipuhan seguro na ipahayag ngona digde an mga mayor na katoyohan kan Organisasyon na ine asin maintindihan an mga mayor na aktibidad na puedeng guibohon kan mga opisyales asin miyembros ninda.
An Knights of Rizal sarong sibiko-patrioticong organisasyon nin mga lalake na maypagmawot na mag adal kan mga katokdoan kan satong pinaka bantog na bayani na si DR. JOSE P. RIZAL., AN MATIR KAN BAGONG BAYAN. An organisasyon na ine aprobado kan ley dahil na sa irarom kan Acta Republika No. 646 kan taon pang Hunyo 14, 1951. A fuera kan pagka civico-patriotico, an Knights of Rizal sarong organisasyon na kultural, mayong secta nin relihyon, bakong partidista sa politika, asin dai nagmimidbid nin kon anong rasa kan mga ka- miembro ninda.(An mga agom palan kan miembros padagos nang nagigin auxiliary members na an apod KABABAIHANG RIZALISTA.) Kaya katabang ninda mga babae siring man.

An mga mayor na Katoyohan kan organisasyon iyo an mga minsunod: (1) An pag-adal kan mga katokdoan ni Dr. Jose Rizal na sinabing Mga RIZALISMO. (2) An pagsa isip asin pagsaboot kan mga katokdoan na iyan sa gabos na klaseng namamanuaang Filipino na isabuhay ine sa TATARAMON asin sa GIBO asin ma alok an gabos na Filipino na arogon asin isa guibo an mga katokdoan na ine nin RIZALISMO. (3) Palaganapon sa pagkairibahan nindang mga miembros an tunay na espiritong. Pagkamoot sa tinubuang bayan ( o patriotismo) asin pagkamakatao sa kapwa. (4) Palaganapon man an tunay napagkaboronyog nin gabos na Filipino sa paggalang asin pag guiromdom kan ngaran ni DR. JOSE RIZAL.asin ( 5), Mag tatag nin mga programa sa pag komemorar kan makahulogan na Pagkamondag asin Pagmartiryo ki DR. JOSE RIZAL..

Yaon seguro diyan sa ikalimang katoyohan an PAGTATAG NIN MGA PROGRAMNG PANCOMUNIDAD, kon saen an organisasyon na ine puedeng maka ayon sa PAG ATAMAN KAN KAPALIBOTAN. Prueba ngani kaiyan an sarong comite kan organisasyon na ine digde sa Naga nagplano na kan saindang mga actibidades ngonian na taon 2005 arog baga kan mga minasonod

1. Pagconducta nin mga seminar Maitokdo an Tungkol sa Buhay-buhay ni Dr. Jose P. Rizal.
2. Pag seminar tunggkol sa Mga Proyektong Pangkabuhayan.
3. Pag tatag nin mga Hardin nin Gugulayon sa Natad o Balconahe nag Gamit sana mga Paso ( Pot Gradening)
4.Pagtatag nin Grupogrupo kan miembros na Magpaparong kan Ilaw sa mga Tinampo (Streetlights) tuwong Agang Amay.
5. Pagbisita nin mga Mayhelang o Napepriso
6. Pag palakaw nin Medical Mission o Paglectura tungkol sa Marhay na Salud nin Hawak.
7. Pag conducta nin mga lectura o Katokdoan tungkol sa pag maneho kan basura asin manonongod sa Kapalibotan.
8. Magtabang sa ibang ahensia kan Ciudad tungkol sa Trafiko asin sa iwasan an Paggamit kan mga bawal na bolong, asin iba pang marhay na proyekto.
Dakol na segurong mga actibidades na iyan na puedeng ayonan kan Knights of Rizal. Kaya padagos na segurong mag-alok kita digde sa colom na ine na mag-ayon kita sa KNIGHTS OF RIZAL asin magtabang Atamanon an Kapalibotan!