MASUWERTE an College of Law kan University of Nueva Caceres (UNC) ta sa kada 10ng nagkua nin bar examination kan taon 2004, pito an nakalusot kabaing nin 74% passing mark na halangkaw sa 31% national passing grade. In fact, 26 an bagong mga attorney kan UNC: Congratulations new barristers!
- o0o -

Sa likod kan kaogmahan kan mga pasado sa bar, yaon an pangapudan ni Senador Miriam Defensor-Santiago na halion na an bar examination ta bako daang tultol na sukol sa kadunongan kan mga abogado: tsamba sana asin an pagigin attorney, dara sana nin suwerte. Nagkataon sanang marhay magtoom!
Alagad bakong si Miriam an inot na nag-suggest na i-itsapuera na an bar examination. An inot na naka-isip na halion na an bar, sarong Bikolano: an dai nang si Pantalaeon Panelo!
Plataforma kaidto ni Panelo kan magcandidato bilang presidente kan Pinas kalaban si Ferdinand Marcos sa Snap Election kan February 7, 1986, an pag-scrap kan bar examination. An mga Atenista ngani kaidto anggot ki Marcos kaya surog na ki Panelo.
Pagkatapos kan pirilian, pinurot baga si Panelo sa kangkungan. Gana an diktador na si Marcos, kaya an paghali kan bar examination dai nadagos.
Saro pa sa plataforma de govierno kaidto ni Panelo iyo an paggibo kan Pinas na estado kan Estados Unidos. Kutana, dolyar an kuwarta ta sa ngonian. Iyo man an paggibo kan cable cars na sistema nin transportasyon kan banwaan. Kutana, dai kita nin transport strike ngonian!

- o0o -

Kun an pasado sa bar examination sagkod sa duwang talinga an ngirit, mas dakul an nakangurot asin murosdot ta dai nakalusot. Alagad, ano daw talaga an tunay na rason ta masakit makalusot?
Tibaad dai nin konsentrasyon sa bar examination ta dai napaonrahan kan ilusyon; igwa nin problema asin nag-iwal an mag-agom bago maghali sa harogn; o parating yaon sa isip an seksi asin magayon na kabit.
Kun minsan tama an simbag, sala an hapot; may veces man, sobra an simbag sa hapot.
May veces makanos an surat-kamot, daug pa an reseta nin doktor na garo kinayas nin manok na texas: dai maintindihan kan examiner.
Kun minsan igwa nin kaiwal na sigue an dasal, napa-novena na dai makapasar, nadagli pa sa simbahan sa Buhi nangangadyi na dai makalusot sa test.
Igwa kami nin kamidbid na pasado na sa bar pero dai naka-abogado ta si nabadusan na ilusyon dai inagom, ibang babae an pinakasalan.
Igwa pa kami nin kabisto na pasado naman sa bar, nag-blow out na, nagpagibo na nin calling card, dai naka-pirma sa roster nin mga abogado na nagreklamo an mga empleyado an abogadillo na dai nagtatao nin tamang suweldo.
Igwa kami nin aram na pamilya na nagtugdok nin itom na kandila sa pamitisan nin rebolto na midbid na santo kan mga abogado: rebolto na may sungay sa angog, sa likod igwa nin ikog, igwa nin pugol na garod, ta an kina-aanggutan na nagkua nin bar examination dai makapasar ta an ama kinamkam an saindang daga!
Long Live the New Pope!
His Grace, Pope Benedict XVI.