Naglikidar ki Endrinal
pinapa-arestar ni Lomibao
CIUDAD nin Legaspi - Si Chief Supt. Restituto P. Mosqueda, Bicol
PNP regional director an nagbilog na nin sarong task force nganing
maarestar na an nagbadil gadan sa comentaristang si Rowell
Endrinal asin iba pang victimang miembros kan media sa Bicol.
Si PNP Chief Director General Arturo Lomibao kan magvisita digdi
sa Bicol kan nakaaging semana nagbuyagyag na igwa na siyang
instruccion sa jefe kan PNP sa region na kaipuhan madakop na an
suspetsado na naglikidar ki Endrinal asin iba pang mga miembros
kan media sa Bicol na kinababalihan ni John Villanueva asin Claire
Domingo.
Pigpahiro na ni Mosqueda an intelligence team nganing
magtarabangan sa pagman-man kan mga responsable sa paglikidar kan
nagkaperang miembros kan media sa Bicol.
Si Endrinal binadil kan Febrero 11, 2004 sa tungod kan Dynamic
Computer Centrum Building sa Ciudad nin Legaspi, binadil siya
matapos kan saiyang programa sa FBN-DZRC.
Pigbisto na kan PNP an suspetsado na nag-gadan sa victima na sinda
Clarito Arizobal Jr. alias Boy Zapanta asin Segundino Boncay alias
Ka Santi, suspetsadong rebeldeng NPA.
Si Arizobal nag- aatubang nin duwang casong robbery in band with
homicide asin nasa ika-tolo sa mga most wanted persons sa
Kabikolan sagcod na may patong nin P250,000.
Si Boncay, saro sa tolong mga suspetsadong NPA hitmen na
naglikidar ki Domingo, dating rebel returnee na naging
comentarista sa radyo. Sa caso ni Villanueva, pighahalat kan jefe
kan PNP sa Bicol an report kan PNP provincial office kan Masbate
kan ginibo nindang investigacion.
An mga incidente nin pang-gagadan nin miembros kan media sa Bicol
inabutan nang caso ni Mosqueda kaya ngani pig-aram niya an mga
pinakahuring investigacion kan mga casong pendiente.
