---

Kada Taon

Pagkalugi kan NCPM nagsakat na sa P8.5M


NAGSAKAT na sa P8.5 milliones an nalulugi sa operacion kan Naga City Public Market (NCPM) cada taon poon kan 2003 kaya determinado na an local na gobierno mag-imponer nin sagcod sa 227.5 por cientong dagdag sa bulanan na arkila sa ocupantes.

Ginibo an public hearing kan Abril 19, 2005 sa mercado publico na pig-atendiran kan mga ocupantes na dai na ngani nagcocontra mientras na igwa man sindang propuesto na 200 por cientong dagdad sa arkila.

Si Frederic Arias, assistant market supt. kan NCPM nagsabi na naglangkaw an saindang pagkalugi huli ta pig-ayon na si P3M na pigbabayadan sa bangko. An City Hall nag-utang nin P50M na ginamit sa rehabilitacion kan loma nang edificio kan NCPM asin nagpoon na kan saindang obligacion na mag-bayad kan utang.

An Task Force Market sa saindang ginibong pag-aadal huli ta perang taon nang lugi an operacion kan NCPM nagrecomendar nin sagcod sa 227.5 por cientong patong sa arkila. Si Fr. Nelson Tria kan Naga City People’s Council iyo an namayo kan sinambit na task force kabali sa mga miembros iyo si Consejal Jose Mari Mercado, chairman kan Committee on Market Affairs kan Sanggunian Panlungsod asin si Tesorero Rodrigo Belleza.

Sinabi ni Tria an recomendacion sa dagdag na arkila dawa na maging break-even na sana dai lang maging liability kan Ciudad.

Pigbuyagyag pa ni Arias na sa presente igwa nganing P300 an arkila sa mga puesto kun icocomparar sa mga privadong edificio na igwa na nganing sagcod sa P30,000 asta P50,000.

An propuestong 227.5 por cientong dagdag sa arkila considerado pang hababa huli ta dai man kaipuhan maki-competencia an LGU kan ciudad sa mga privadong edificio na pigpapa-arkilahan sa mga negociantes.

Dai nang kaulangan an Sanggunian Panlungsod na mag-aprovar kan ordenanza sa pagpalangkaw kan arkila huli ta an federacion kan mga ocupantes sa mercado an nagfafavor na ngani, alagad an pigdedebatehan kun pera an cantidad na ipapatong.