Diputado Alfelor purongoton, sabi
CIUDAD nin
Iriga - Nagkaperang miembros kan local na media sa ciudad na ini
an nagpahayag kan saindang mga paghihinakit sa bakong patas na
tratamiento ni Congresista Felix “Nancing” Alfelor sa mga taga
prensang regular na nagvivisita sa saiyang district office.
Pinapasuya ni Alfelor an mga miembros kan prensa sa paagi nin
pagpahalat nin sobra sa sarong oras antes mag-atubang sa mga
entrevista sa saiyang oficina. Kabali si pigparapahalat iyo an mga
production manager, news director, hali sa print media, asin mga
announcer na hali pa sa manlaen-laen na estaciones nin radyo.
Bako lang ini an pangyayari kan magluwas an congresista hali sa
laog kan saiyang oficina kan maheling an mga miembros kan media,
sabay na nagbutas nin pahayag na “Magbaralik na sana kamo sa aga”.
Nagbago na talaga si Congressman, sabi kan nagkaperang miembros
kan media, sa rason na dai na ninda namamatian an maray na
tratamiento sa sainda arog kan enot na mga taon asin eleccion.
Sabi pa na enterong depressed an narereparo nindang actuacion kan
diputado kabali na an saiyang staff iyo na kun bakong pungot, an
hehelingon “tiger look”, may veces na-muroslot asin kun minsan
nag-ngongorubngurob.
Namasdan kan mga taga media, nagpoon na maging purongoton an
diputado kan cuarto distrito kan mag-untok operacion an saiyang
duwang nabangkaroting bangko kan mga nakaaging bulan asin malaymay
na kamugtakan kan saiyang salud.
Siya nasa ika-duwa pa sanang termino matapos enot niyang daogon sa
eleccion si bise gobernador Salvio Fortuno sa eleccion kan taon
2001. Sa ikaduwang laban dinaog niya si dating bise gobernador
Imelda Papin na dai naman nag-aser an saiyang karisma asin mga
political jingle kan panahon nin eleccion. (Romeo Olea)
