ISYU SA JUETENG
PD Mapalo, pula-puti sa orden ni
PNP Chief Lomibao
An PNP
provincial office sa Camarines Sur mayong aseguracion na
mapapapundo an operacion kan illegal na sugal na jueteng apesar
kan directiva ni Director General Arturo Lomibao na kaipuhan
ipapundo na kan mga namamayo kan policia an sinambit na illegal na
actividad.
Sa entrevista sinabi kasoodma ni Camarines Sur PNP provincial
director Sr. Supt. Romeo Mapalo, na igwa nang “standing order” na
pundohon an jueteng alagad kaipuhan an cooperacion kan gabos
nganing totalmenteng mapuho an sugal.
Haloy na an pigsasabi ni Mapalo na “standing order” contra jueteng,
sagcod sa ngonian masarong taon na siya bilang jefe kan PNP sa
Camarines Sur dai an nakurtar an sugal envez naghiwas pa sa apat
na distrito kan provincia.
Nag-iinit na an isyu sa mahiwas na operacion kan jueteng matapos
magluwas sa mga pagduda na an M-1 asin M-2 iyo sinda First
Gentlemen Mike Arroyo asin Presidential son Congresista Mikey
Arroyo respectavamente.
Dawa na ngani dai siya makatao nin aseguracion na mapupoho an
sinambit na sugal nagpangako ini na saiyang ipapasunod an strike 3
policy ni Lomibao.
Inako pa kaini sa entrevista kan Bicol Mail sa paagi nin telepono
na an mga Chief of Police asin siya bilang Provincial Director an
puedeng matanggal sa puesto kun dai magkakapurondo an sinambit na
ilegal na actividad sa saindang area of responsibility (AOR).
Sa kahapotan kun igwa siya nin pigtalaan na panahon sa mga jefe de
policia sa totalmenteng pagpapundo kan sugal, dai siya makatao nin
definidong kasimbagan envez an sabi igwa na kan “standing order sa
campania contra jueteng.”
Si Lomibao, igwa nang pigcrear na Anti-Jueteng Task Force na
pinamamayohan ni Chief Supt. Ricardo Dapat, director kan PNP’s
Criminal Investigation and Detection Group (CIDG).
An jefe kan PNP an nagpatanid sa mga polis na an principio kan
“command responsibility” an saiyang iimplementar sa mga regional
asin provincial director kun dai mapapapundo an jueteng sa
saindang AOR.
Nagpatanid pa siya na magabat na an castigo sa mga illegal numbers
games, susog sa Acta Republika 9287 na nagpapalangkaw kan
penalidad sa mga envuelto sa sinambit na sugal.
An penalidad puedeng malaom sa carcel nin 30 sagcod sa 90 dias an
mga personajes asin empleados kan jueteng operators, anom sagcod
sa walong taon sa mga correador o agente, walo sagcod sa sampolong
taon, sa mga controllers asin supervisors diez asta sa doce anyos,
sa maintainer asin operators doce sagcod sa katorce anyos, asin sa
financiers 14 asta 16 anyos.
An jueteng dai basta napapapundo huli kan proteccion kan mga
halangkaw na official kan PNP asin mga oficiales nacional maging
local, kaya an kahapotan sagcod sain an kakayahan kan PNP nganing
makurtar na an sinambit na sugal.
