Sr. citizens nagpasaurog na sa
LGU
LIBMANAN,
Camarines Sur - Hinagad na kan Barangay Senior Citizens
Association of Station Church Site sa banwaan na ini na maki-aram
na an local na gobierno nganing estricto nang ma-implementar an 20
por cientong discuento sa pagbakal nin mga medicina para sa gamit
kan senior citizens base sa Expanded Senior Citizens Act o an Acta
Republica 9257.
An mga miembros kan senior citizens nagpasar nin resolucion serye
numerado 01 kan Marzo 12, 2005 na naghuhurot sa LGU Libmanan sa
paagi ni Alcalde Rodolfo Jimenez Sr. asin an Sanggunian Bayan na
magpasar nin ordenanza na ibali sa pagkoa nin business
permit/mayor’s permit kan mga drugstores asin pharmacies sa
Libmanan na kaipuhan irespetar an RA 9257.
An sinambit na senior citizens association sa paagi kan saindang
Presidente Vicente C. Rastrullo, nagpadara na kan copia kan
resolucion ninda sa oficina ni Jimenez asin Sanggunian Bayan.
Haloy na an RA 9257, alagad dakul na mga botica an nagsisinutil
apesar na igwa nin castigong iimponer sa dai matao nin discuento.
Susog sa provicion sa premirong pagkakasala - mamulta nin
P50,000.00 asta P100,000.00 asin anom na bulan sagcod duwang taon
na pagkaka-priso; sa ika-duwang pagkakasala - multang P100,000.00
asta sa P200,000.00 sagcod na duwa asta anom na taon na
pagkaka-priso; asin sa ika-tolong pagpasaway - cacancelaron an
business permit.
Nagtutubod sinda na sa paagi kan ordenanza sa pagsugo sa mga may
sadiri kan botica makakatabang ini sa mga miembros kan asosacion
bako lang hali sa Station Church Site envez sa iba pang mga senior
citizen hali sa 75ng mga barangay kan Libmanan.
Sa entrevista kan Bicol Mail sa jefe ejecutivo local, sinabi kaini
na enot na nindang pigtiripon an mga maysadiri kan botica nganing
pagirumdoman na iimplementar an Acta Republica 9257.
Sa kahagadan na magpasar nin ordenansa an Sanggunian Bayan iyan
yaon na sa decicion kan mga consejales, sabi pa ni Jimenez.
Si Levi P. Asuncion, iyo an nagpadara kan copia kan resolucion sa
oficina kan Bicol Mail.
