Mapaparalisar an transportacion sa Camarines Sur sa Lunes (Abirl 11) sa pagsuporta kan sector nin transporte digdi sa pang nacion na juelga matapos magkasurondo an 32 na mga lideres kan manlaen-laen na organisacion sa lindong kan Camarines Sur Federation of Transport Operators/Drivers Association and Cooperatives (Cam. Sur FETRODACO) Inc. sa pamamayo ni Rafael M. Duque.

Sa ginibong miting kan Abril 3, 2005 an mga presidente kan manlaen-laen na organisacion kan sector nin transporte sa provincia an nagfirma sa manifesto na minasuporta sa nationwide transport strike na ma-efecto amay nin pagkaaga sa maabot na Lunes.

Nagpatanid an transport sector na mabuelta sa protesta gigibohon tolong aldaw kun dai itatao an kahagadan.

Bakong protesta sa paghagad nin dagdag na flete envez apat an saindang pigbiklad na mga kahurotan sa Arroyo administration na kinababalihan kan mga minasunod: 1. An pagpapundo kan padagos na paglangkaw kan precio kan gasolina asin crudo, asin roll back kan precio kan producto nin petrolio, 2. An pagtunaw na kan oil deregulation law na siyam nang taon nag-efecto dai man naging rason na mapahuros an precio envez nakabuelo logod an pagparalangkaw kan precio nin gasolina asin crudo, 3. An pag-take over kan gobierno sa Petron, asin pag-re-activar kan Oil Price Stabilization Fund OPSF).

Sinabi ni Duque na igwa na sindang coordinacion sa mga lideres kan transporte sa Manila na iyo an mangengenotan sa pang nacion na juelga.

An pagparalisar kan viaje sa Camarines Sur sarong pusog na suporta sa National Land Transportation Council, dakulang organisacion nin transporte sa National Capital Region nganing efectivo an sinambit na nationwide transprot strike.

Sa Ciudad nin Legaspi, na saro sa piglalaoman na masuporta sa sinambit na protesta an CONDOR Bicol an nagpahayag na dai sinda makikisabayan envez sa paagi sana kan noise barage.

Posibleng maglansar man sinda nin suhay na protesta, kaya an mangyayaring juelga sa Lunes dai man enterong mapaparalisar an viaje sa mga provincia kan Kabikolan huli ta kulang an cooperacion kan ibang organisacion.

Si Sr. Supt. Romeo Mapalo, nagpahayag na saiya naman na pig-alerto an mga Municipal Police Station na magpatrolia sa mga highways nganing maibitiran an posibleng pagbaragat kan mga juelgista kan ibang mga sasakyan na dai nagsusuporta.

Sa Ciudad nin Naga na yaon digdi nagraralaog an mga pampasajerong jeepney, bus asin filcab madestino nin mga miembros kan policia si Chief of Police Ramon Ranara.

Si Alcalde Jesse M. Robredo an nakatalaan na magpaluwas nin mga vehiculos nganing hakoton an mga empleados na ma-aafectaran kan sinambit na protesta asin si iba pang mga pasajeros sa centro kan ciudad na puedeng malaom huli kan juelga.

Mientras tanto, an Bagong Alyansang Makabayan (BAYAN) asin iba pang militanteng grupo an masuporta sa nationwide strike mientas na sinda padagos nang nag-kukurahaw sa pagtunaw kan oil deregulation law asin an pagtuyaw sa GMA administration sa kapabayaan na mapugolan an pagparalangkaw kan precio nin petrolio.