CIUDAD nin Legaspi - Mapaaram na sa Bicol PNP regional office si Chief Supt. Restituto Mosqueda sa bulan nin Mayo 2005 matapos kan saiyang sampolong bulan na maging jefe kan PNP sa Bicol huli ta nakatalaan nang magretiro sa servicio.

Nagpasabot na si Mosqueda sa nagkaperang mga bise gobernador sa Kabikolan kan magkaigwa nin pagtiripon sa Ciudad nin Legaspi dai palang nahahaloy.

Bako man sa pagka-discontento sa laog kan organisacion kan PNP envez huli ta nasa edad na kan saiyang pagretiro base pa sa saiyang osipon sa mga bise gobernador.

Siya saro sa halipot sanang mga bulan na naging hepe kan PNP sa Bicol na nag-tukaw sa puesto sa ginibong turn-over of command kan premirong semana kan Agosto 2004, saiyang pigribayan si dating Regional Director Jaime Lasar.

Kan magtukaw siya sa puesto dai man na-implementar kaini an pangako na ipapapundo an operacion kan sugal na jueteng sa Kabikolan na sagcod sa ngonian nagpapadagos asin mala ngani naging efectivo huli ta naging contralisado na an operacion sa mga provincias.

Maging sa Ciudad nin Legaspi asin Albay na yaon digdi sa Camp Simeon Ola an regional command kan PNP sa Bicol natuyawan siya kan manlaen-laen na sector huli ta sagcod sana sa patanid na ipapapundo an sinambit na sugal.

Mientras tanto, si P/Supt. Francisco Peñaflor, dating jefe kan PNP sa ciudades kan Naga asin Legaspi an pigdestino na ni Mosqueda sa PNP provincial office kan Catanduanes bilang OIC provincial director.

Si Peñaflor, piglalaoman na iyo man giraray an magiging “fullfledged” na jefe kan PNP sa sinambit na provincia.