AN proyecto sa patubig kan kaaomahan nin mga paraoma dai kabali sa 10-point agenda ni Presidente Gloria Macapagal-Arroyo mala ngani si dapat na on billion pesos na prosupuesto sa National Irrigation Administration (NIA) base sa Agricultural Fisheries Modernization Act (AFMA) pigtagamahan sana nin P400 milliones para sa gabos na region.

Kan barangaon na sa 13ng region P27 milliones an prosupuesto ngonian na taon digdi sa Kabikolan asin kun babangaon kan anom na region kulang na ngani sa P5 milliones kaya afectado an planong pagpahiwas kan servicio sa patubig orog na ngonian na panahon nin El Niño phenomenon.

Si Engr. Alexander A. Reuyan, bagong director kan NIA Bicol kan maconduciran nin entrevista kan Bicol Mail kasoodma nagsabi na ini ngonian an saindang inaatubang na problema kaya an saiyang paagi iyo an paghanap nin dagdag na fondo gikan ki Congresista Rolando Andaya, Jr. chairman kanpoderosong Committee on Finance and Appropriation sa Camara-Baja.

An Department of Agriculture (DA) an saindang prioridad iyo an pagpahiwas nin tanuman nin paroy mientras na saindang pigpapalakop an mga hybrid seeds nganing mapalangkaw an produccion nin paroy. Madidificilan na marealisar kun kulang an tabang kan gobierno sa irrigation system.

Dawa pa makoa kan NIA Bicol an target collection ngonian na taon na cantidad P22 milliones gikan sa pigbayad kan mga paraoma sa servicio sa patubig kun susumadahon an fondo sa dapat magdalagan sa Bicol base sa AFMA an kulang pa.

Kabali sa pig-prioridad ni Reuyan na gamiton an mga empleados ninda na destino sa mga aircondition na oficina na maging envuelto sa coleccion dawa na mga division manager. Ini saiya nang pigpasunod kan siya madestino sa region 7 asin 8.

Siya dai man bensido sa plano kaidto ni dating Presidente Joseph Estrada na maging libre an patubig sa mga paraoma huli ta mayo na nganing pig-papabulos na tamang alocacion sa saindang agencia mas lalong malakma an financia an resulta puedeng maafectaran an programa sa irrigation system.