80 casong dengue sa Cam. Sur

BULA, Camarines Sur - Maabot na sa 80ng mga casong dengue an pig-report kan mga Municipal Health Officer sa Provincial Health Office (PHO) poon kan bulan nin Enero asta kan Julio 2005 mas hababa an bilang kun icocomparar kan nagtalikod na taon na nagsakat sa 109ng mga caso sa kaparehong periodo.

Mayong dapat i-alarma sa provincia alagad kinakaipuhan na maglikay sa paagi nin regular na pagmantenir kan kalinigan sa kapalibotan kan mga residencia sa mga barangay.

Si Dr. Alejo Aralar, PHO officer sa Camarines Sur nagpahayag na an amay na campania kan mga municipal health officer asin cooperacion kan mga oficiales de barangay contra sa dengue saro man sa contribuente nganing maibitiran an paglangkaw kan caso na afectado na ngonian sa ibang region mientras na padagos an pagbulos nin pag-uran.

An fogging operation sa mga public school na posibleng may nag-eestar nin dengueng namok sa mga stagnant water saro sa dapat tawan nin prioridad nganing dai na ini maglakop, sabi pa ni Aralar.

An prevention campaign kan DOH iyo an pigtawan nin prioridad kaya ngani nagbaba an numero kan mga caso kan dengue sa provincia kun icocomparar sa ibang lugar sagcod na igwang mga binawian nin buhay.

Sa 80ng mga tinamaan kan sinambit na helang mayo man nin binawian pa nin buhay, alagad ini iyo si report kan mga MHO dai man kabali si ibang pigdalagan sa privadong hospital.