---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


RAUL S. ROCO

Saro kang pisog na ruminambong sa ene-erokan can mga oragon.
Saro kang famosong Bicolano na orgullo can enterong nacion.
Mini-mirar ka nin huli sa mga principio na saimong ipinaki-paglaban.
Saro kang honesto, matanos, asin may kabatidan na servidorcan banwaan.

Saro kang hinahanga-ang student leader can mamidbidan can mga tawo.
Saro kang de campanelyang abogado na matibay magpagana nin mga caso.
Saro kang batikanong legislador na puminadrino nin dakul na leyes.
Saro kang tunay na lider na namayo sa dakul na nga organizationes.

Paaram kahimanwa, sa saimong mamundong pagbaya;
Kuta na yaon an saimong pagmato sa nagsasakit na banwa.
Paaram, padangat na aki can Kabikolan;
Kuta na ika an mata-o nin giya sa tahaw can kadikloman.

Paaram, parasorog can mga jovenes asin kababaihan;
Kuta na ika an mahasi nin paliwanag sa banwaang nariribongan.
Paaram tugang na sarong bolanos na Bicolano;
Kuta na sinuwerteng magin presidente can mga Filipino.

Sayang ta dai ka natawan oportunidad na mamayo can Pilipinas.
Kuta na na-ipaheling mo kun paano magserbi an
Bicolano na dai na-potik, nadaya, o nahabas.

Sayang ta dai mo nagamit an saimong batbat na kamot
Tanganing an mga oportunista asin buaya sa gobierno makatarakot.
Sayang ta dai mo nagamit an saimong ka-araman na mapacarhay
An economia, mapa-asenso asin madagdagan an mga hanap-buhay.

Sa saimong pagbalik sa satuyang Kagurangnan
Magserbi man logod inspiracion an saimong mga naginibohan.
Sa saimong paghali, sana padagos ming magiromdoman
An mga principiong saimong pighiras asin pina-nindogan.

Sa saimong pagrayo, sana padagos ming tongkosan,
An saimong mga paghulit asin tataramon nin kadunungan.
Sa samuyang huring pagpa-aram kami maogmang mina-saludo;
Sa sarong tunay na lider na ini-atang an sadiri, para sa mga Filipino!