Maogmang, mamundo an trabaho nin security guard (sekyu): magin blue or white guard. Makamurumundo, kun minsan, ta en vez magin bantay sa pasaway: salakay an kina-aabtan!

Maogma kun destino sa mga banko. Laen sa halangkaw an suweldo, tama pa sa horas an trabaho. Iyan lang, an sekyu iyo an inot na tinitipok kan mga bandido.

Maogma, siring man, kun hotel an gina-gwardiyahan. Igwa nin sideline ta may mga salampating hababa an lupad na ataman pambahug sa mga gurang.

Alagad mapungaw kun destino sa mga saradit na establisamiyento asin harong na pribado ta, may veces, bako naman pag-sekyu an ginigibo:

Sa simbahan kan St. Joseph, simbahan kan mga Taipan (Intsik na mayaman), an sekyu iyo an binubutong kan padi na magin sakristan asin sa pagkolekta kan atang. Effective sa pagkolekta kan atang ta nakasukbit nin badil sa habayan. Kun kulang an naabot na padrino, kun igwa nin ikinakasal, an sekyu an nagigin interino!;

Kaidto na kulang pa sa Naga City an tatao kan trabaho sa radyo, an sekyu iyo an na-sign on kun an assigned na announcer naglamaw sa pagturog ta yaon sa honeymoon; iyo an na-sign off ta an announcer turog ta sobra an pagkaburat.

Diyan sa calle Barlin, harani sa RMN-DWNX, igwa nin inuman nin mga macho. An sekyu, na plastado sa sulot na bado pang-sekyu, iyo an nagluluto nin barbecue sagkod sa mga horas na ini;

Sa mga tindahan sa centro an sekyu an nag-aalsa kan mga sinaudan kan mga parokyano; igwang naghahakot nin kusot; may nag-ooperate nin xerox; kun tikapo sa waitress asin nagkuno-kuno an customer, an sekyu iyo an nagwi-waiter. May veces, kun absent an singer, an sekyu iyo an entertainer.

Kun gwardiya sa dakulang harong, an sekyu iyo an naglilinig nin awto, nagtitipon nin basura; pinipili an nalalapa sagkod dai nalalapa, nagkakarigos nin ayam.

Kun gwapo an sekyu iyo an naghihiso sa pagkarigos kan amang, orug na kun mayo an agom ta yaon sa bulangan. Pagbasa na an bado dagos nahuba na nasabay na sa pagkarigos kan magayon na amang!

- o0o -
Kadaklan kan mga sekyu hababaon na marhay an suweldo kaya sa Department of Labor and Employment (DOLE) asin sa National Labor Relations Commission (NLRC) tambak an reklamo.

Mayo nin 13th month pay; da binabayaran nin overtime, holiday pay asin rest day. Dai pa nin Pag-ibig asin SSS coverage. Kaya kun nagagadan sagkod sa langit an tangis kan misis ta dai nin death benefits.

Huli ta mayo sa minimum wage an suweldo, kadaklan kan mga nakukuang guardiya kan mga ahensiya dai nin disiplina, may rekord sa pulisya, dai nin lisensya, mayo nin training, mayo nin drug test, neuroexam, sinublian an uniform, musingon an lalawgon, dai palas an kuko na sobra an itom.

Makamurumundo, kun minsan, ta envez magin bantay sa pasaway; salakay an kina-aabtan!

Kaibahan sa paghabon sa banko na binabantayan; kakutsaba sa kidnap-for-ransom sa miyembro kan pamilya na gina-gwardiyahan; asin iba pang heinous crime laban sa linalaugan na hanapbuhay!

Arug na sana sa brutal na pagkagadan kan mag-agom na Alberto Tan Benchuan: mga sekyu na seguro hali sa impiyerno an nagin mitsa kan kagadanan!

Ngonian, igwa pa daw kamo nin tiwala sa mga security guard?

Binayadan tanganing magbantay sa mga pasaway. Idto palan: bantay-salakay!

Marhay pa an ido talagang nagbabantay. Bakong arug kan sekyu, kun minsan, bantay-salakay!-