P0.49 dagdag
na tarifa kan Casureco 2, ilegal?
CALABANGA,
Camarines Sur - “No more petition. No Hearing. No Investigation.”
Ini an reclamo ni dating Board President Domingo C. Yu contra sa
Camarines Sur II Electric Cooperative, Inc. (CASURECO II) huli ta
nagpalangkaw nin P0.49 cada kilowatt hour kan nagtalikod na bulan
na mayong pig-plantiar na peticion sa Energy Regulatory Commission
(ERC) na iyo an dapat na proceso antes mag-implementar YU
nin dagdag na tarifa sa corriente an cooperativa nin corriente.
An Casureco II sa average na pigbabakal na 14,500,000 na kilowatt
hour sa Napocor cada bulan sa pigpatong na 49 centavos cada Kwh
nag-delencia an cooperativa nin P7,105,000, sabi pa ni Yu.
Nagpadara na nin surat an dating Board President ki Atty.
Fructuoso C. Lagunzad, Jr. Executive Director III kan ERC sa San
Miguel Avenue, Ciudad nin Pasig.
Saiyang pig-cucuestion an inaapod na Automatic Generation Rate
Adjustment (AGRA) na sarong priviliyo sa cooperativa nin corriente
sa pagpalangkaw nin tarifa na mayong peticion asin inaprovaran an
ERC.
Naghahapot si Yu sa oficina kan ERC, huli ta an Casureco II
nagpalangkaw nin tarifa na P0.08 cada kwh kan Junio 2005 asin
P0.49 cada kwh kan nagtalikod na bulan nin Julio.
An valido asin legal na pagpalangkaw iyo an decicion kan ERC kan
Abril 13, 2005 na may case No. 2004-178 sa generation charge na
P3.8966 cada kwh.
Alagad an cooperativa nagpalangkaw kan saindang generation charge
sa P4.0238 cada kwh kan bulan nin Junio 2005 sagcod na nagsakat sa
P4.4340 cada kwh kan nagtalikod na bulan nin Julio.
Hinagad ni Yu sa ERC na kun tama an saiyang reclamo kaipuhan
ibalik sa consumedores an pigpalangkaw na tarifa huli ta bakong
makatao an priviliyong ini kan sinambit na cooperativa nin
corriente.
Nagpatanid pa an dating presidente kan junta na sagcod na darahon
niya an isyung ini sa corte nganing tawan nin leccion an
manijamiento asin ibalik an sobrang nakolecta sa electric bill.
Nag-ngangalas si Yu ta dai nag-gigirung ngonian an presenting
junta directiva na dapat ipasabot an mga basang na paglangkaw kan
tarifa sa corriente asin kun cuestionable dapat ini ulangon.
