Casureco I, ipapabakal na

Cantidad P139-million

Si GM Quiñones nagdemiter na sa puesto habo nang magpasakop sa bagong mapadalagan kan cooperativang nalulugi.





FISHING PORT sa Camaligan, Camarines Sur iyo na sana an industrial consumer kan Casureco I na nagbabayad nin halangkaw na electric bill nin maabot sa P200 mil cada bulan.



LIBMANAN, Camarines Sur - Ipapabakal na an Camarines Sur I Electric Cooperative, Inc. (Casureco 1) sa interesadong dakulang capitalista na malaog sa Investment Management Contract (IMC) na pigtaya an cantidad P139 milliones asin pigtalaan na kan Department of Energy an plaso sa pagsumiter kan aplicacion sa pagsubasta sa Septiembre 20, 2005.

Sa Noviembre 20, 2005 iyo na an oficial na pag-bukas kan selyadong envelop na gigibohon an subasta sa oficina kan DOE sa Manila sa precencia kan mga oficiales kan National Electrification Administration (NEA).

Si General Manager Francisco Quiñones nagsumiter naman kan saiyang resignation letter sa junta directiva na ma-efecto sa Deciembre 31, 2005 mientras na an NEA iyo an ma-aprovar kaini.

Nagserve nin 23 anyos sa servicio si Quiñones bilang GM asin siya an nagribay sa pinaka-enot na GM na si Francis Nacianceno.

Habo na ni Quiñones na mag-apply sa arin man na mapadalagan kan cooperativa sa lindong kan IMC pinagmarhay na magpahingalo na sa servicio.

An decicion kan manijamiento na ipabakal an operacion huli kan inaabot nin P4 milliones an pagkalugi cada bulan nadidificilan nang makabayad kan power bill sa Napocor.

Sa ginibong general assembly kan mga miembros consumedores kan cooperativa nin corriente kan Junio 26, 2005 na ginibo sa Gainza, Camarines Sur pigvorotohan na kun lakma na sa financial an operacion mas marhay na maglaog na sa IMC nganing mapakarhay an servicio mala ngani sa ngonian cada semana igwang mga nangyayaring brown-out huli kan mga loma nang mga gamit arog kan transformer. Dai na masalidahan huli ta tikapo na sa fondo an manijamiento.

Pigfavoran na kan mga miembros kan junta directiva maging kan mga empleados na ipabakal na an operacion kun ini an solucion sa inaatubang na problema sa pagkalugi.

Si Board President Eugenio Lagasca, Jr. nagsabi na an pagparababa kan ingreso kan cooperativa huli sa “unbundling of rate” kan EPIRA Law. Inaabot na nin P7.62 an saindang tarifa cada kilowatt hour hababa pa an revenue huli ta 85 por ciento kan saindang consumedores mga residential. An 15 por ciento kaini, nakokoa na sa commercial, industrial asin edificio publico kabali na an mga electric light sa mga poste.

Sa mga darakulang consumedores solamente an may halangkaw nindang coleccion iyo an Camaligan Fishing Port sa Camaligan, Camarines Sur na nakakacolecta nin sagcod sa 200 mil pesos.

Si Bicol Oil Mill sa Pasacao, Camarines Sur na dating nakaka-colecta nin P1 million an sarado na asin an National Irrigation Administration, alagad fermi pang napuputolan huli ta dai nakakabayad kan saindang electric bill sa tamang panahon.

An Castalla group sarong agencia na iyo an nagconducir kan kamugtakan kan operacion kan mga cooperativa nin corriente sa nacion na pig-gastosan kan World Bank asin awtorisado kan Department of Energy.

An Casureco 1 sa primerong distrito asin IV sa Partido area an kabali naman sa isusubasta sa Noviembre 20, 2005. An duwang cooperativang ini sa Camarines Sur parejong nagtugot na maglaog sa IMC huli kan saindang pagkakalugi.

An Castalla group iyo an marecomendar sa paglaog sa IMC asin papaagihon sa consultacion sa consumedores na kun haen inaprovaran sa ginibong general assembly kan Junio 26, 2005.

An IMC puedeng magcontra nin 10 asta sa 15 anyos, alagad an pighahaditan kan ibang mga director na dai maiibitaran an pagpalangkaw nin singil sa tarifa sa corriente.

Sa bagong manijamiento an 20 anyos na sa servicio an kabali sa 30 por ciento kan mga empleados an tatanggalon na babayadan man kan saindang mga separation pay. An mga miembros kan junta directiva an magpapadagos sa puesto asin tatawan nin dagdag na trabajo.