Tolong Cafgu pigsuko kan militar sa PNP


AN MGA oficial man sana kan militar na destino sa Lupi, Camarines Sur sa pamamayo ni Lt. Ronnie Fuentes asin si Detachment commander Sgt. Noel Perras an nag-arestar asin pigsuko sa Police Station an tolong mga miembros kan CAFGU na suspetchado sa pagsaksak gadan ki Consejal Dennis S. Sevilla, 28, miembro kan Sanggunian Bayan kan LGU Lupi.

Ini an paliwanag ninda Fuentes asin Perras sa mga miembros kan junta provincial kan Camarines sur sa ginibong session regular kan Martes (Agosto 16) kan sinda invitaran kan presidente kan Philippine Councilors League (PCL) Camarines Sur Chapter na si Vocal Antonio Olaño.

Pig-aram kan consejo provincial kun may sisimbagon an oficial kan militar na yaon sa saindang poder an tolong Cafgu na sinda: Raymund Malinao y Velasco, 30; Randy Belesario y Hernandez, 24; asin Homer dela Torre y Javier, 23; gabos residentes kan Lupi, Camarines Sur.

Sinda iyo an nagtarabang-tabang sa pagsaksak gadan ki Consejal Sevilla sa barangay Bulawan, Lupi kan Julio 27, 2005. Sa autopsy report kan doctor pigpahayag na 16 an tama sa victima.

Si Perras yaon sa beerhouse mga 1.5 kilometros an distancia sa pinangyarihan kan crimen.

Pigpaliwanag pa kan duwang oficial kan militar na bakong totoo na saindang pigtatago huli ta an mga pag-iriba nganing Cafgu gustong padulagon an tolong mga joven pang suspetchado alagad dai sinda nagtugod kaya ngani nasangatan tolos nin caso asin piglaom sa carcel.

Duda man an ibang mga taga Lupi, Camarines Sur sa mga paliwanag kan duwang militar huli ta an report sa policia an grupo kan mga polis kan Lupi sa pamamayo ni Chief of Police Ricardo Arce iyo an nagdakop sa mga suspetchado bakong pigsuko ninda Perras asin Fuentes.

Mientras tanto, naging cuestionable man an pagsangat nin caso sa prosecution office kan Camarines Sur kan Lupi Police Station ta casong homicide sana envez na dapat murder mientras na igwa talagang intencion na gadanon an victima. Si Provincial Director Romeo Mapalo iyo man an nakareparo kaini.