Trimobile ma-peticion naman sa dagdag flete


NAG-AANDAM na nin peticion an transport sector sa Ciudad nin Naga para sa dagdag na flete sa mga pampasajerong trimobile dawa na ngani na-implementar pa sana kan dagdag na on peso na nag-efecto kan Agosto 15.

An Camarines Sur Federation of Transport Operators/Drivers Association and Cooperative (CSur Fetrodaco) Inc. sa pamamayo ni Rafael Duque nagpahayag na bako man sa pag-abuso sa sunod-sunod na peticion ninda sa Sanggunian Panlungsod, alagad huli kan haros cada semana padagos an paglangkaw kan precio kan producto nin petrolio mapipiritan sinda na maghagad liwat nin dagdag na flete.

Si peticion kan trimobile sector na P2 na dagdag na flete an naaprovaran sana kan Sanggunian Panlungsod cantidad P1 na ngonian P6 na an regular na flete sa enot na tres kilometros na distancia kan viaje asin dagdag na 50 centavos sa masunod na kilometro.

Sa ngonian ngani kulang na sa P200 an saindang nakokoa sa doce oras na pagkayod alagad pigkidar naman digdi si sa arkila sa operator kan trimobile asin gasolina.

Cantidad nang P34 an cada litro kan gasolina asin igwa pang masunod na paglangkaw an mga compania nin crudo kaya mapipiritan an sector nin trimobile na magplantiar nin peticion sa dagdag na flete, sabi pa ni Duque.

Sa inaprovaran na dagdag na flete an mga discounted na pasajeros arog kan senior citizens, estudiantes asin disabled P4.50 nagsakat na ngani sa 30 por ciento envez na dapat 20 por ciento sana susog sa pigpapasunod kan LTFRB.

Inako kan sinambit na sector na magagabatan na an pasajeros sa ano man na dagdag na flete na posibleng cantidad on pesos, alagad mayo sindang magiginibo huli ta kun dai gigibohon mayo man sana mangyayari sa saindang maghapon na pagkayod.

Mientras tanto, an organisacion nin jeepney an plano mahagad man nin P1.00 na magiging P8.50 na an regular na flete. Pighahalat ninda an decicion kan saindang pag-iriba sa Manila kun noarin isusumiter sa LTFRB.