Sa pagmawot ta na mapakarhay an pagtipon asin pagdispatsar kan basura hale sa mga harong asin sa comunidad mas marhay na tandaan na gayo an iba ibang klase na kan basura. Sa paagui po kaini lalong maaaraman kon arin sa mga ine an puedeng pakinabangan arin an dae na asin kon saen ine dadarahon asin kon anong aldaw o oras ine dapat darahon sa temporaryong aponan.

An mga informasyon na ine hale mismo sa DENR in coneksyon kan pagpasar kan Acta Republika No. 9003 an Batayan kan sinasabing Ecological Waste Management Program kan enterong gobyerno kan Pilipinas.

Iyo ine an clasifikasyon kan iba-ibang klase nin basura na dapat tandaan kan lambang kagharong. Kon puede kopyahon asin guibohon pang aro-aldaw na basehan:

I. MGA NALALAPA ASIN PUEDENG ICOMPOST
A. Basura Sa Kusina
1. Mga tada o mapanos nang kakanon
2. Mga tolang asin dahon nin gulayon; obak nin mga frutas
3. Tolang nin karne o tada paghanda pagluto nin sira o manok, gamgam asin iba pang kapareho ninda.

B. Basura Hale sa mga Tinanom
1. Dahon, burak, o mga sanga nin kahoy
2. Gamot asin ginabing doot

C. Ati hale sa mga hayop
1. Odo o ipot nin hayop, manok, o gamgam
2. Anit nin baka damulag, kanding asin iba pang hayop

D. Ati guican sa mga tao
1. Mga ginamit nang malumhok na papel o tisyu
2. Odo nin tao
3. Mga basa na papel

II. DAI NALALAPA ALAGAD PUEDENG GAMITON ULI NA BASURA
1. Mga metal, lata, aluminum na lata
2. Alang na anit, balokag nin manok, gamgam
3. Pasang salming o bote
4. Mga matagas na bingkay o shell
5. Mga goma asin gabos na produktong goma
6. Mga plastik na lalagan o produkto mismong plastic.
7. Alang na mahibog na karton asin papel
8. Mga sobrang tela o hinabol na bado
9. “Styrofoam”
10. Mga tinta sa printer sa xerox asin mga rolyo nin printer.
11. Mga raot na goma sa auto o bisekleta

III. MGA DAI NALALAPA ASIN DAI PUEDENG GAMITON ULI:
1. Mga sanitary napkin sa aki o sa mga adulto man
2. Mga ”disposable na diaper”
3. Mga gamit nang panggosgos na tela sa salog
4. Mga lalagan nin lana (oil) na polyvenyl (PVC)
5. Mga ceramico na pasa na.
6. Mga tetrapak
7. Mga patos nin kendi o mga pakete nin shampoo asin iba pa
8. Mga botelyang plastik.

IV. MGA BASURANG MAPELEGRO (HAZARDOUS WASTE)
1. Mga lata na maytada nin pinta o thinner
2. Mga bateriya sa radyo o motor o auto
3. Mga raot na radio, mga stereo asin telebisyon
4. Mga raot nang “appliances” sa harong arog baga kan refrigerator, mga lutuan, washing machine asin iba pa.
5. Mga baseho nin mga pansumpit sa namok, koratsa asin iba pang peste.

An listahan na ine kan klasipikasyon kan gabos na klaseng basura sa kaharongan asin sa komunidad kon matandaan kan gabos makakatabang na gayo kan tamang pagdispatsar kan satong basura sa ciudad.