Marhay na sana ngani ta inot na nagka-igwa nin impeachment complaint si Gloria: an presidente na dai namumutan, dai iginagalang, kutungan kan mga buaya sa kuntod na mga kongressman, “kutong cops” na mga heneral, asin linta sa bukid na mga local public officials.

Kun nagkataon, si Kagawad Joe Grageda, an chairman kan Public Utilities Committee kan Sangguniang Panlungsod, igwa kutana nin problema. Plano, soboot, ninda Raffy Duque asin Tyron Jaucian na ipa-impeach si Joe sa sahot na nagdaya sa mga trimobile driver sa dagdag na singil na P2 kada pasahero. Alagad P1 sana an nagin kadagdagan: 50% an kakulangan - impeachable (kono) na kasalan!

Basado sa Ordinansa No. 2005-002 poon Agosto 11, 2005 an plete sa trimobile P6 na kada pasahero sa inot na tulong (3ng) kilometro asin dagdag na P0.50 kada kilometro. Sa mga estudyante, senior citizen, asin disabled P4.50 an minimum na pasahe sa inot na tulong (3ng) kilometro asin dagdag na P0.50 sa kada masunod na kilometro. Igwa man diskwento an mga estudyante asin senior citizen kun igwa nin ID; an mga biyadi: siring kan pilay, bota, raut an payo, asin pula-bungog, dai na kaipuhan an ID ta hiling-hiling na an ebidensiya.

Nagsumitir nin motion for reconsideration an mga trimobile driver tanganing gibuhon P2 an dagdag na bayad alagad dai tinugot kan Sangguniang Panlungsod.

Tama na, sobra na an hinahagad kan mga trimobile driver na Pasakit naman sa riding public. Sa pagmati kan city hall dai man nin pakinabang an mga driver: dai nin solidong suporta sa mga kandidato kan city hall pag-abot nin pirilian.

Totoo, igwa nin maabot sa 1,500 an trimobile sa siyudad. Entonses igwa nin 1,500 na botantes, kaibahan an agom: 3,000 gabos. Alagad dai man solido an boto ta ipinapabakal kan mga lider sa mga pulitiko.

Saro pa, banga an boto sa trimobile industry, iyan an hiling kan city hall: an driver asin operator kan trimobile, magkalaban. Anggot an driver sa operator ta kuripot sa maintenance kan trimobile, dai pa sinda ipinapa-registro sa SSS.

Sa ibong na lado, anggot man an mga operator sa mga driver ta mga abusado: parating may utang sa boundary, dai pa ikinakayod, kun minsan, an trimobile - bitin sinda sa income!

Orug sa gabos, isinusuka kan publiko an kadaklan sa mga trimobile driver ta sobrang pasaway:

Mga manyakis. May veces an magayon na pasahero ginuguyod sa diklom asin linulugusan; an babaeng pasahero an nakalingaw na magsulot nin pang-irarom sinisiripan.

Musingon. Dai nagkakarigos, kun minsan. An yukyok sobra an load sa angsod, igwa pa nin dagdag na bad breath.

Mahilig sa trip-cutting asin double-ride pa an singil na bayad sa mga pasahero.

Dai nin disiplina. Maski sa tahaw kan tinampo napundo kun nababa asin nasakay nin pasahero.

Namimili nin pasahero. An pangit asin an gurang linilihisan. An seksi sana asin an magayon an pinapasakay. Maski pulis dai pinupunduhan: orug na kun aram na dai mabayad!

Paraliog. Kun nasingil nin bayad sa mga biyahero sagkod sa liog. Hali sa terminal pasiring sa harong: P50, nakikipag-iwal pa kun minsan.

Sarong pasahero hali sa Manila. An plete sa aircon an ibinayad P300 sana. Nag-okupar nin trimobile hali sa terminal pasiring sa Tinangis hinagadan nin P500.00

Sa bayad na P500 sakop na an sa boundary; take-home-pay; sarong aldaw na kunsumo sa gasolina; igwa pa nin pang-toma!

Tama na, sobra na. Saka ngonian ipapa-impeach pa si Kagawad Grageda?