Alfelor, hadit kun magdemiter si GMA
CIUDAD
nin Iriga - Nagdemiter an Bicolanang DBM Secretary Emilia Boncodin,
alagad an Boncodin Highway mayong kaulangan na maparalisar an
pagpadagos kan proyecto na mabagtas kan viaje haling Rinconada
pasiring sa Malinao, Albay.
An problema kun mapatagbang sa puesto si Presidente Gloria
Macapagal-Arroyo bako lang an Boncodin Highway an puedeng
maafectaran envez pati na an pagbuhay kan Bicol River Basin
Development Project (BRBDP).
Ini an patanid ni Congresista Felix “Nancing” Alfelor, Jr. kan
cuarto distrito kan Camarines Sur na padagos nagsusurog ki GMA
asin hadit sa saiyang distrito na puedeng pati na an mga proyecto
an magka-arabala kun mapahali sa Malacañang an Presidente.
Igwa nang enot na P100 milliones an pigtustos na fondo kan
gobierno para sa pagbuhay liwat kan BRBDP na piglalaoman na an
full implementation kan proyecto sa sunod na taon 2006.
Ini dakulang proyecto sa region cienco na haloy nang piglalangkag.
Alagad an ibang mga lideres kan Camarines Sur an haloy nang
nakadangog kan pangako ni Presidente Arroyo sa BRBDP na enot
pigsasabi na masikad na an proyecto kan taon 2003, inabot na
ngonian nin 2005 pigsabi naman na sa taon 2006.
Mala ngani, enot nang pigtukahan si dating Congresista James Jacob
kan segundo distrito na maging Project Manager kan BRBDP kan
magvisita si Mrs. Arroyo sa capitolio provincial dai man
narerealisar naghahalat sana an dating congresista.
Ngonian na pighuhurot na kan manlaen-laen na sectores asin iba
pang mga politico na magdemiter sa puesto si GMA dakul na mga
kaalyado kan presidente an nahahadit na dakul na mga proyecto an
mawawara kun mapatalsik sa puesto si GMA.
Si Alfelor an matabang ki GMA sa pagcampania na favoran an charter
change mientras na nagpangako an presidente na malibot sa mga
provincia nganing icampania nin amay an pag-enmienda kan
Constitucion.
