---

Comelec nag-aandam kan eleccion sa brgy.

Garci, natuyawan inapod na makasuya


CIUDAD nin Legaspi - Sagcod na mayo pa nin ley na pig-uuktaba an barangay election sa Octubre 2005 an Commission on Election (Comelec) nag-coconsiderar pa kan nakatalaan na eleccion mala ngani saindang pigpapadagos an continuing system of registration sa mga municipalidad asin ciudades.

Ini base sa Resolucion No. 7463 kan commission na reglamento sa continuing system of registration sa pagpadagos kan registracion kan mga votantes sa pag-gamit kan Data Capturing Machines (DCM) sa enterong nacion.

Si Atty. Liza Z. Cariño, assistant regional director kan Comelec sa Bicol nagpahayag na pigponan kan mga election officer an pag-ako nin maparegistro kan ika-duwang semana kan Junio asin ini matapos 120 dias antes kan nakatalaan na eleccion.

Huli kan nangyayaring crisis sa politica hababaon an resulta kan registracion na sagcod sa presente mga 5 por ciento pa sana sa region cienco. Ini iyo man an report kan mga Provincial Election Supervisors gikan sa manlaen-laen na mga municipio.

Mapadapit sa acusacion ni Comelec Chairman Benjamin Abalos na “mayabang” si dating Commissioner Virgilio Garcillano, sinabi ni Cariño na “makasuya” si Garcillano na nagsayuma nang mag-elaborar kan iba pang “kayabangan” kan dating oficial kan Comelec na dating nadestino digdi sa Bicol sa pagreparo kan dalagan kan nakaaging presidential election.

An ibang mga empleados kan Comelec sa Camarines Sur ipinahayag na demoralisado naman huli kan padagos na mga controvercia sa saindang oficina na an naging mitsa iyo si Garcillano.

Alagad kun padagos an mga controvercia sa Comelec, si Cariño dai man nagtutubod na ini an causa kan hababang por cientaje kan mga nagpapalistang votantes mientras na an ugali kan Filipino nahiro sana kun ultimo oras saka sana napasiring sa saindang mga oficina kan Comelec registrar.

Dinagdag pa kan oficial kan Comelec sa Bicol maging an mga privado asin pang gobiernong bangko pigpugol an ano man na pag-aprovar kan mga salary loan nin mga oficiales de barangay huli ta tibaad biglang mag-anunciar na dagos an eleccion.

An Land Bank of the Philippines (LBP) an naghahapot sa oficina kan Comelec kun may eleccion sa barangay sa bulan nin Octubre, dai masimbagan envez sagcod na mayo pang inaaprovaran na bill sa Congress an Comelec nag-aandam kan eleccion. An problema iyo an kawaran nin fondo kan commission na iyo man an puedeng makapugol kan sinambit na eleccion.

An mga aplicante na maparegistrong votantes dapat nag-eedad na nin 18 anyos paitaas na igwa nang anom na bulan na residency sa saindang barangay kun saen sinda ma-voto.