ISYU SA HIGH-TECH NA AGENCIA
Manager kan GSIS nagpaliwanag sa SP
BAKO
an high-tech na gamit kan Government Service Insurance System (GSIS)
envez an kakulangan nin mga empleados na nagka-surespendi an
binabasol kun sa-atol an saindang proceso kan mga aplicacion sa
salary/policy loan maging kan retirement kan mga miembros kan
agencia.
MALLARI
Ini an paliwanag ni Manager Marina Mallari kan GSIS Naga Branch
kan maging visita sa Sanggunian Panlungsod kan Ciudad nin Naga sa
ginibong session regular kan Lunes (Agosto 1) matapos magluwas sa
bareta kan Bicol Mail isyu kan Julio 21, na “High tech na gamit
kan GSIS, palpak”.
Walo an kinastigo nin preventive suspension na mga division chief
asin rank and file na empleados kan Naga Branch na sagcod sa
ngonian pendiente pa an saindang motion for reconsideration.
Kabali na an paghaklas na kan casual na empleados na nakakatabang
pa sa pag-proceso kan mga papeles kan aplicante sa mga
salary/policy loan.
Dai man tubod an nagkapera sa mga empleados kan gobierno sa
paliwanag ni Mallari ini pantahub sana kan saindang atrasadong
transaccion sa oficina. Sinabi kan ibang empleados kan Department
of Agriculture sa Bicol na may oficina regional sa Pili, Camarines
Sur na dai pa nasususpendi an sinambit na mga empleados sa haloy
man giraray an pagproceso kan saindang papeles.
Pig-orgullo man kuta an saindang mga high-tech na gamit alagad dai
man nagseservi nin toltol sa mga miembros kan agencia de seguro
sayang sana kan saindang premium contribution, sabi pa kan
empleados kan DA.
Pigdahilan pa kan branch manager na huli kan centralisado an
saindang operacion sa main office sa Manila an ginigibong pag -
“uploading” na-aabalang marhay kaya ngani an simbag sa mga
naghahapot kun ano na an kamugtakan kan saindang aplicacion yaon
pa sa “posting.”
An solucion pa kan GSIS iyo na dai muna akoon an mga aplicacion
kan mga miembros kun dai pa na-proceso an ibang mga na-enot na
aplicante saka sana ninda papaisihon an mga agencia de gobierno
maging sa LGU na isumiter na an mga papeles nganing ponan na an
pag-proceso kan mga papeles kun na-aprovaran na an enot na mga
aplicantes.
Dai nasisimbagan ni Mallari kun perang aldaw ma-ipapaluwas an
tsikie kan mga aplicante mientras na kan yaon pa sa lomang
edificio bako pang high-tech an saindang gamit pag-completo na an
gabos na mga papeles 24 asta sa 72 oras puede nang itao an tsikie.
Kaya ngani an mga miembros nagdududa na puedeng toyong pig-aabala
kan oficina huli kan posibleng nagkukulang na an fondo kan GSIS na
ginagamit sa ibang mga transaccion.
An pagdudang ini pigsikwal man kan GSIS huli ta bako lang
nagkukulang na sinda nin mga empleados envez an hibog kan mga
pendienteng aplicacion hali sa Camarines Norte asin Camarines Sur
na nasobra pa sa langkaw niya na an volume kan mga pig-fifirmahan
na papeles.
Inako pa kan branch manager nganing dai siya maabala sa pag-firma
may minsan nagdudulag siya sa miembros kan prensa na maconducir
nin entrevista. Siya iyo sana an awtorisado na mag-atubang sa ano
man na media interview.
