Lomibao visita sa Baao PNP
Baao,
Camarines Sur – Si PNP Chief Director General Arturo Lomibao asin
alcalde Mel Gaite iyo an nangenotan sa ginibong inaguracion kan
P2.5-M na edificio kan Baao Municipal Police Station kan nakaaging
semana asin ini iyo an pinaka-enot na natapos na proyecto sa
pagpaconstruir nin PNP building sa manlaen-laen na mga provincias
kan Kabikolan na saiyang pig-ponan kan ini manombrahan ni GMA na
bagong pamayo kan PNP.
Bago siya nagpasiring sa Baao, kaibahan niya si PNP Spokesman
Chief Supt. Paul Bataoil, Bicol PNP Chief Victor Boco asin iba
pang oficiales kan PNP sa ginibong groundbreaking kan construccion
kan police station sa mga banwaan kan Uson, Ezperanza, Cawayan
asin Pio Corpuz, gabos kan provincia nin Masbate.
An proyecto kan PNP sa pagpatindog nin bagong mga police station
nganing magka-igwa nin mahiwas na lugar na isuhay na sa mga
Municipal Hall kan mga banwaan.
Si Sr. Supt. Romeo Mapalo, PNP Provincial Director sa Camarines
Sur na kaibahan sa inaguracion kan Baao Police Station nagsabi na
igwa man nin kaparejong proyecto si Lomibao sa Magarao asin sa dai
mahahaloy poponan na an construccion kasabay man kan bagong edicio
kan PNP Provincial Office sa Concepcion Grande, Ciudad nin Naga.
An mga edificio igwa man nin counterpart an local na gobierno
afuera kan fondo hali sa PNP. An fondo sa construccion kan PNP
Provincial Office pigtagamahan nin P10 milliones.
Igwa pang ibang icoconstruir na police station sa Sorsogon, Albay
asin sa iba pang provincias kan Kabikolan maging sa ibang region,
segun pa ki Lomibao.
