Torres nakapuntos vs Sales
Pili,
Camarines Sur – Nakapuntos na si Director Balagtas J. Torres kan
ibasura kan corte an peticion ni Hector M. Sales sa pighahagad na
mag-isyu nin temporary restraining order (TRO) huli kan saiyang
pag-cuestion kan legalidad sa pag-tukaw ni Torres komo Regional
Executive Director kan Department of Agriculture sa Bicol.
Alagad dai pa tapos an laban legal ni Sales contra ki Torres huli
ta masangat pa nin motion for reconsideration an saiyang abogado
sa orden na pinaluwas kan Noviembre 23, 2005 ni Juez Nilo A.
Malanyaon kan RTC Branch 32 kan Pili, Camarines Sur.
Sa decicion kan corte si Sales mayo nin diretso legal sa oficina
Regional kan Executive Director asin an saiyang Special Order
bilang OIC an malinaw na binawi na efectivo kan Septiembre 21,
2005, an aldaw kan si Torres nag-asumir kan saiyang puesto bilang
DA regional director susog sa Special Order 320 na pig-isyu ni
Secretary Domingo Panganiban.
Sinabi pa ni Malanyaon na sa sinambit na caso igwang prima facie
evidence na igwa nin diretso legal si Torres na mag-asumir sa
oficina.
An petitioner pig-designar kaidto si Secretary Lorenzo sa puesto
bilang OIC Executive Regional Director na nag-efecto kan Noviember
29, 2003, an sinambit na designacion magpapadagos sagcod na dai pa
pig-revoked.
An respondiente nagpresentar man kan saiyang evidencia na kan
Agosto 1, 2005, siya pigdirehiran na mag-asumir kan puestong
Regional Director kan oficina regional kan DA sa Bicol. Ini
firmado ni Secretario Panganiban. Siya naka-asumir sana kan
Septiembre 21, 2005 sagcod na saiya nang pig-ehercir an poder
susog sa saiyang posicion.
Si Sales, nagsangat nin casong Usurpation of Authority contra ki
Torres na nakatalaan nang magsikad an preliminary hearing. Padagos
nang piglalaban sa pagtubod niya na cuestionable an papeles kan
respondiente.
An saiyang oficina harani sa Executive Regional Director
pigpasarahan ni Torres sagcod na pigpaseguro kinandadohan huli kan
padagos na pagsinutil na dai i-turn over an mga papeles kan
oficina.
