Aniversario kan Komunista
matuninong-Ka Roger Rosal
An CPP/NPA
nagcomple kan saindang aseguracion sa publico na mayong
mangyayaring ofensiva sa panahon kan saindang ika-37ng aniversario
kan Deciembre 26, matapos kan mga acusacion kan militar sagcod
nagdeclara nin “red alert” laban sa mga rebeldeng NPA sa posibleng
paglansar nin pan-aatake sa military asin PNP sa panahon kan
saindang aniversario.
Sinabi ni Ka Roger Rosal, oficial na parapahayag kan CPP/NPA na an
militar asin an PNP man sana an nag-aacusar sa sainda na mahasok
nin kariribokan sa panahon kan saindang aniversario.
Ini naprovaran kan ika-37ng aniversario kan pagkakatugdas kan CPP
naging matrangkilo, sabi pa ni Ka Roger.
Helingon na sana an record kun igwa sindang piglansar na mga
ofensiva kan mga nakaaging aniversario huli ta sinda mawot na
maging matuninong an saindang mga actividades.
Si Bicol PNP Regional Director Victor Boco nagpahayag sa miembros
kan media na heneralmente naging matuninong an sinambit na
aniversario na mayong record na nag-atake an mga kalaban kan
gobierno sa tropa kan PNP maging sa militar.
Sa anom na PNP Provincial Office sa Bicol an oficina ni Boco mayo
nakarecibe nin report nin mga incidente na kagibohan kan mga
rebeldeng NPA.
Alagad an pagtubod kan Bicol PNP dai naka-abante sa ofensiva an
mga rebelde huli ta 24 oras sindang alertado sa ano man na
pag-provar na paglusob sa mga Municipal Police Station maging sa
detactment kan militar.
Pigconfirmar ni Ka Roger na mayo na sindang plano na mag-declara
nin ceasefire huli ta an duwang aldaw na declaracion ni Presidente
Gloria Macapagal-Arroyo para sa December 25 asin Enero 1, 2006
bakong sa sincero para sa tunay na katuninongan.
