Briones absuelto kan SP
PILI,
Camarines Sur - Amay an pamasko kan Sanggunian Panlalawigan kan
Camarines Sur sa saindang kaibahan na ex-officio member Domingo U.
Briones kan magpaluwas nin decicion na absuelto sa casong
Dishonesty and Immorality sa resolucion kan Sanggunian Bayan kan
Pamplona, Camarines Sur nin penalidad na perpetual
disqualification sa pagkapot nin puesto sa gobierno.
Sa session regular kan Martes kan Sanggunian Panlalawigan si Vocal
Ariel Oriño chairman kan committee on administrative case
nagpaluwas na kan saindang recomendacion na ibasura an resolucion
kan SB sa Pamplona, CSur na pinaluwas kan Octubre 12, 2005 na
pigvorotohan kan mayoriang miembros kan consejo.
Pigfavoran kan mga miembros kan sanggunian panlalawigan na mayo
man nin nagcontra kaya ngani tolos naheling ki Briones an saiyang
hararum na hinangos kan basahon an recomendacion sagcod na pig-uyonan
kan saindang mga pag-iriba.
An resolucion nagbase huli ta nagka-igua nin forum shopping asin
lack of jurisdiction asin igwang naheling na motivo political asin
personal. An nagsangat nin reclamo contra ki Briones iyo si
Dulcenea A. Ludovico kan Junio 1, 2004.
An sinambit na caso enot na pigplantiar sa Sanggunian Panlalawigan,
sinibog asin naghanap nin ibang puedeng favoran siya iyo na an
Sanggunian Bayan na nagdecicion na castigohon na halion na sa
puesto an respondiente.
Dai na naghalat si Briones na magpaso an 30 dias nganing
makasumiter siya nin apelacion kan caso sa Sangguniang
Panlalawigan kan nakaaging Noviembre 15, 2005.
An defensa ni Briones na malinaw na pagbalga kan reglamento sa
forum shopping asin may politica an caso contra sa saiya. An
nagreclamo segun ki Briones igwang personal na motivo huli sa isyu
kan land dispute sa saindang barangay na pigfavoran niya an lado
kan mga paraoma.
Sa isyu kan dishonesty asin immorality pigreclamo an ex-officio
member huli ta kan nagplantiar nin certifico de candidatura sa
kargong barangay capitan kan eleccion kan 1997 na saiyang
pigsumpaan ginamit an pangaran ni Patricia Abrian bilang saiyang
legal na esposa.
Alagad segun sa decicion mayo man digdi nin escandoloso huli ta
aram na kan publico na haloy nang nag-iibahan bilang mag-agom
mientras na si tunay na agom na pigpakasalan si Hedelita Plaga
nagkasundo sinda na magsuhayan kan taon 1983. An enot na esposa
kan respondiente an yaon na sa Manila nag-eestar asin igwa naman
nin ibang familia.
Sinabi pa na “common knowledge” na si Patricia asin Domingo haloy
nang nagsasaro mala ngani igwa na nin mga aki. An kasaroan
nagcandidato pa nganing consejal kan eleccion local kan Mayo 2004
gamit na an apeliedong Briones.
An LGU mayo nin poder na magcastigo nin perpetual disqualification
sa arin man na oficiales local envez yaon na ini sa poder kan
jusgado, sabi pa sa decicion.
An mga miembros kan committee on administrative case kinababalihan
ninda Vocal Angel Naval, Emmanuel Llaguno, Rex Oliva asin Waren
Señar.
An nagreclamo dai paman mahagad nin reconsideracion sa sinambit na
decicion mientras na dai paman siya nakakarecibe kan copia kan
resolucion hali sa Sanggunian Panlalawigan.
