Pinoy
Kurakot?
Graft
and corruption: numero dos (kono) an Pilipinas sa enterong kinaban,
sabi kan Asian Development Bank (ADB)!
Sabi ni Tita Miriam dapat, soboot, number one!
Talamak an graft and corruption sa gobyerno, poon ki kapitan
sagkod sa Malacañang;
Sa militar, poon SPO1 sagkod sa PNP chief Director General;
Sa civilian, poon sa sadan na igwa nin barakalan sa paagi nin
kilohan sagkod sa parakolekta nin atang sa simbahan;
An mga gobernador, dai pa pinalibre ni Tita Miriam: nagbabariwas,
soboot, ning kagingking sagkod imbuwelto sa illegal logging.
An Kagurangnan napurisaw kan kamugtakan kan Pinoy sa kinaban kaya
sinugo si San Pedro na magbaba sa daga tanganing nag-imbestigar.
Naghilig si St. Peter sa Naga City, sa Central Bus Terminal kan
CBD II. Naglunad sa trimobile, pinabayad kan driver sa tricycle ni
Eddie Almenor nin plete para sa senyor citizen sabay an hadok sa
kamot. Sabi ni San Pedro sa sadiri: honesto na, magalang pa. Pinoy,
pano ka nagin kurap?
Nagtubos nin community tax certificate. Pinabayad kan maboot na
empleyada ss city hall ni Mayor Jesse Robredo nin minimum na bayad
sa cedula sabay an hadok sa angog kan gurang. Sabi ni San Pedro sa
sadiri: honesto na, maboot pa. Pinoy, pano ka nagin kurap?
Nakaisip maglibang kaya nagduman sa bulangan. Magayon an sultada.
Nagpusta sa manok na pula. Nanggana, dejado pa. Dai nin sobra, dai
nin bawas an pustang ikinurahaw sana ni San Pedro idinuhol na kan
kristo sa bulangan ni Eddie Mercado. Sabi ni San Pedro sa sadiri:
honesto na, mahigos pa. Pinoy, pano ka nagin kurap?
Nagpa-anunsyo sa radyo asin peryodiko - radio station DWRN asin
Bicol Mail - na mapagibo nin sarong simbahan sa Naga. An
interesadong contractor makipag-helingan ki San Pedro sa simbahan
kan Basilica Minore.
Tulong contractor an nagsimbag sa invitation to bid ni St. Peter:
contractor na Amerikano, si Engr. McDonald; contractor na Hapon,
si Engr. Makuto; asin contractor na Pilipino, si Engr. MaO.
Inot na kinaulay ni San Pedro iyo an contractor na Amerikano.
Hinapot kun gurano an bid price. An sabi kan Kano: $3 milyon -
fixed price!
Hinapot kun paano an breakdown kan $3 milyon. Sabi kan Kano: $1
milyon for labor; $1 milyon for material; and $1 for the efforts
of the contractor.
Sunod na kinaulay an contractor na Hapon. Hinapot an Hapon kan
saiyang quotation. Sabi ni Engr. Makuto: $6 milyon - no less, no
more!
Hinapot an breakdown kan $6 milyon, an sabi kan contractor: $2
milyon for labor; $2 milyon for material; and $2 milyon para sa
ganansya kan contratista!
Finally, an ultimong pinag-interview iyo an contractor na Pinoy,
si Engr. MaO. Hinapot ni San Pedro kan saiyang bid price. Sabi kan
contractor: very reasonable asin practical! $9 milyon sana, St.
Peter!
Haros ma-stroke an gurang. Aban-aban, naghapot ki Engr. MaO; ano
tabi an breakdown kan offer mong $9 milyon?
“An breakdown”, sabi kan contractor”: $3 milyon, para saimo, San
Pedro; $3 milyon para sa kapagalan ko; asin an natatadang $3
milyon para sa contractor na Amerikano na iyo an matrabaho kan
simbahan mo, San Pedro”.
Dai makatubod an gurang, kaya an sabi: “Pakiulit mo daw, Pinoy”.
“An sabi ko: $3 milyon para saimo, San Pedro; $3 milyon para sa
kapagalan ko; asin $3 milyon sa contractor na Amerikano na
matrabaho kan Simbahan mo, San Pedro”.
Napahuyom na sana si San Pedro asin nagsabi: “Okay ka Pinoy. Maski
Santo puwede mong butungon sa impiyerno”!
