AN Bridge Program na pig-implementar ngonian na school year 2004-05, bako pang solucion nganing mapalangkaw an calidad kan educacion sa mga public school sagcod nang -aadalan kan Department of Education na gibohon limang taon an high school.

Nasa 94.4 por ciento kan mga nagtapos sa elementaria an dai pa preparado na magsakat sa “freshmen”. Ini an mga pahayag ni Secretario Florencio Abad kan mag-atubang sa press conference sa miembros kan media sa Ciudad nin Naga kan nakaaging Febrero 21.

Siya naging juespe de honor sa ginibong planning workshop kan Naga City School Board na pinamamayohan ni Alcalde Jesse M. Robredo.

Inako ni Abad na serioso nang pig-aadalan kan DepEd na dagdagan nin sarong taon an high school mientras na sa elementary level dapat mag-clase muna sa mga pre-school.

Kaya ngani kabali sa saiyang plano na poon sa burokasan nin clase sa Junio 2005 mabukas na nin mga pre-school sa cada barangay. Magiging nang rekisito na antes akoon sa grade 1 kaipuhan magtapos muna sa pre-school.

Digdi nakakabentaje sa mga private school na pig-oobligar muna na magclase sa mga pre-school, sabi pa ni Abad.

Kan nagtalikod na taon 20 por ciento sana an mga nakapasar sa High School Readiness Test (HSRT), alagad bako si gabos na nagbagsak sa sinambit na examinacion an naglaog sa Bridge Program huli ta ini naging optional.

Sa ngonian pig-eevaluar ni Abad an resulta kan Bridge Program, alagad dai na piglinaw kun an posibleng pagsikwal na kan Bridge Program an karibay iyo an pagdagdag nin sarong taon kan high school.

Sinabi pa sa press conference ni Abad na 80 por ciento kan mga paratukdo sa mga public school an kaipuhan na mag-atendir sa mga seminar sa pagtukdo kan subject na english. Ini para mas madagdagan an saindang kaaraman sa pagtukdo kan sinambit na subject.

An Bridge Program na dating pigponan na ipasunod kan panahon ni dating DepEd secretary Edilberto de Jesus an pigcocontra kan nagkaperang mga legislador envez pakarhayon na sana an calidad sa pagtukdo sa mga estudiantes.

Huli, kaini, an pig-aadalan kan DepEd iyo an pag-comparara kan mga estudiantes na dai asin nagkoang Bridge Program na puedeng maaraman sa pagtapos kan school year ngonian na taon.