SA PAGPA-BOLD SHOW
Suspendidong empleado
sinangatan casong libelo
CIUDAD nin
Iriga - Liwat naman sinangatan nin casong libelo antes kan pasko
si Margarito Cerillo, suspendidong empleado kan Iriga City Water
District (ICWD) kan saro naman na oficial kan water district.
Si Board Chairman Perfecto I. Cheng kan ICWD, dai pa nacontento sa
enot na casong pigsangat ni director Eladio Nagrampa, Sr., kan
Agosto 2004. Yaon na sa city prosecution office an duwang casong
libelo mientras na si enot na caso nakalampas na sa 60 dias na
prescriptive period.
Si assistant Prosecutor Mariano H. Canuto, iyo an nadestinohan na
magconducir kan preliminary investigation mayo pang paliwanag ta
dai pa napaluwas nin recomendacion kan enot na casong libelo.
Si Cerillo, sinampaling nin duwang magkasunodan na preventive
suspension kan ICWD matapos ibuyagyag kaini sa media na soboot
nagpa-bold show an nagkaperang miembros kan junta directiva asin
ibang empleados sa oficina nin nagkatolong veces kan nakaaging
taon.
An sinambit na pagbuyagyag ni Cerillo sa paagi nin entrevista sa
saiya kan mga miembros kan media iyo an naging ugat kan pagsangat
sa saiya kan sinambit na mga casong libelo sagcod nang kinastigo
nin tolong bulan na magkasunodan na mga preventive suspension.
Si Cheng asin iba pang mga oficiales kan ICWD an tolos man
nagpahimotikan kan mga acusacion kan empleado kaya ngai napiritan
sinda na magsangat na nin casong libelo na pendiente ngonian sa
preliminary investigation kan city prosecution office.
An suspension sa saiya huli kan caso administrativo asin
nagtutubod siya na gaganahon niya an caso maging an casong libelo
dakula an posibilidad na ibasura man sana kan city prosecution
office.
Pigbuyagyag pa kan suspendidong empleado na igwang politico sa
Ciudad nin Iriga an igwang coneccion an linea kan tubig pasiring
sa privadong swimming pool asin ini dai registrado o ilegal an
coneccion. (Romeo Olea)
