HALI SA TINAMBAC, CSUR
Saro gadan sa meningo
DOH nag-bandillo
dai ma-alarma
AN pinaka-primerong casong meningococemia sa Bicol na an paciente
gikan sa brgy. Cagliliog, Tinambac, Camarines Sur an pigconfirmar
base sa death certificate kan hospital matapos ma-confined nin
tolong oras binawian man sana nin buhay na an paciente nag-eedad
nin un-anyo asin may pitong bulan.
An paciente si John Ivan M. Morfe, binawian nin buhay kan Enero
10, 2005 sa Saint John Hospital sa Ciudad nin Naga, an attending
physician iyo si Dra. Olivia Tuy-Rances.
Naka-record sa oficina kan Civil Registrar sa City Hall kan Ciudad
nin Naga na may Registry No. 20050069 na an causa kan pagkagadan
iyo an “DISSEMINATED INTRAVASCULAR COUGULATION MENINGOCOCCEMIA”
base sa certificacion kan attending physician.
An bangkay tolos pigpalubong kan mga doctor dai na pig-uli sa brgy.
Kagliliog, Tinambac, Camarines Sur envez sa public cemetery sa
brgy. Concepcion, Ciudad nin Naga huli ta bawal nang itransportar.
Si Dr. Nestor Santiago, regional director kan Department of Health
(DOH) sa Bicol nagsayumang magconfirmar na an paciente positivo na
sa meningococcemia huli ta kaipuhan pang maggibo nin sadiring
examinacion an saindang oficina regional.
Nagkoa na sinda nin specimen sa paciente asin kaipuhan halaton
muna an resulta kan examinacion kan saindang laboratorio antes
confirmaron mientras na ini sainda munang pigcoconsiderar na
“suspect meningococcemia”.
Nagpatanid si Santiago na dapat dai ma-alarma an mga taga
Camarines Sur huli ta tolos sinda nagconducir na nin prevention sa
posibleng mag ulakit na mayo naman dapat ipaghadit.
Dawa na ngani pighahalat pa an resulta kan examinacion sa
laboratorio an DOH asin an Provincial Health Office sa Camarines
Sur asin Ciudad nin Naga an naggibo na kan epidemiological
investigation sa lugar kan paciente sagcod sa pigdarahan na
hospital.
Si Alcalde Rosito Velarde kan Tinambac, nagsabi na nagsiasat na sa
salud si Dr. Salvador Betito. Municipal Health Officer kan
saindang banwaan sa mga magurang asin sadiring tao na nakarani sa
victimang paciente asin gabos nasa marhay na kamugtakan an
saindang salud.
An DOH an andam sa sinambit na helang huli ta normal na ining
nangyari sa Camarines Sur asin Sorsogon kan taon 2004 na igwa man
nagadan nin walong paciente an anom gikan sa Camarines Sur.
Naagapan tolos kaya ngani dai na naglakop na mayo man nag-atubang
nin mga kahaditan sa salud an mga taga DOH.
An kaparehong helang enot na nagbungkaras poon kan nakaaging bulan
sa Ciudad nin Baguio asin igwa nang mga suspechado sa kaparehong
helang sa Ciudad nin Dagupan, Quirino asin Negros Occidental.
