---

SA PAGPAREGISTRO SA CDA hinali ni PGMA
ECs, pinapadificilan kan NEA

AN National Electrification Administration (NEA) iyo man sana an nagpapadificil sa 119ng mga electric cooperatives (ECs) sa nacion nganing dai makaregistro bilang stock cooperative sa Cooperative Development Authority (CDA), kan magpaluwas nin memorandum na gibohon 51 por ciento an quorom sa general assembly sa conversion nganing masunod an guidelines asin iregistro sa CDA.

Si dating guidelines sa pag-aprovar kan conversion sa stock cooperative abot sanang 25 por ciento an numero nganing ini dai pa nangyayari sa mga pinapaapod na general membership meeting kan arin man na cooperativa.

Sa apat na mga cooperativa nin corriente sa Camarines Sur inaabot sana nin 900 asta 1000 an nag-aatendir sa mga pinapaapod na asemblia.

Sa Casureco II, si General Manager Antonio Borja nagsabi na sarong ka-imposiblihan an memorandum kan NEA na ipako sa 51 por ciento an quorom sa pag-aprovar kan pagparegistro sa CDA.

Sa cada taon na asemblia kan mga miembros consumedores digdi halangkas na an sobra sa 1,000 an naatendir. Igwang labi sa 60 mil an registradong miembros consumedores kan Casureco II dai ngani nagkaka-igwa nin 25 por ciento o dapat 15 mil an kaipuhan mag-atendir, gigibohon pa kan NEA na “50 plus one.” Kun ini an masusunod kaipuhan mag-atendir an sobra sa 30 mil na consumedores.

An mga cooperativa nin corriente nag-fafavor na sa conversion sa stock cooperative nganing makalibre sinda magbayad nin milliones pesos na buis sa mga Local Government Unit. Igwa nang decicion an Corte Suprema na an mga cooperativa nin corriente dai libredo sa pagbayad nin mga buis siring kan real property tax, business tax asin iba pa.

Sinabi pa ni GM Borja na sa bulan nin Febrero asin Marzo 2005 nagtalaan sinda nin mga district consultation nganing hapoton na an mga miembros kun mafavor sa pagparegistro sa CDA nganing maging stock cooperative.