May Himala!

Totoo, igwa talaga nin milagro: dati garo manok na rukrok, ngonian daug pa an texas sa purok; dati garo sirang hito na mapungaw, ngonian garo talusog na makibsaw; kaidto malalata na, ngonian buhay na!

Iyan an milagrong nangyayari sa mga Lolo, edad 40 sagkod 80, nin huli sa wonder drug na Viagra, bulong sa igwa nin helang na erectile and sexual dysfunction: sa lalaki, minakupos; sa babae, menopause.

Kaya si Lolo ngonian abot sa duwang talinga an ngirit ta happy nights are here again. Iyo man si Lola, in high spirits, ta nababayobo an tinanom na masitas!

Katunayan, kun si Lolo dai nin cuarta, si Lola madaling utangan nin pambakal nin Viagra. Sa totoo lang, si Lola parating igwa nin reserva sa bulsa na itinatao ki Lolo kun nakahigda na ta kun gamiton sa iba!

Alagad kun igwa nin maogma, igwa man nin nagkaka-igwa nin problema:
Sarong taga CASURECO II pornada an biyahe sa America ta malunad na sana sa eroplano, nabutbutan kan saiyang agom sa maleta an reseta nin doctor para sa 20ng tabletas nin Viagra!

Tanganing makabawas sa gastos, an ini-inom na Viagra binabanga sa duwa. Resulta: an epekto yaon sana sa puro. An saiyang flagpole malumuyon!

Igwang nag-tomar Viagra, pinahaloy sa nguso. Aksidente, nakalaog sa labot nin ngipon an bulong: nagatok an ngaragngag, an dila nagbaskog!

Kun babakalon an Viagra, medyo mahal: P450 an cada tableta, 12ng oras an benino. Igwa pa nin mas mahal, an Ciales: P650 an cada tabletas an epekto: 36 na oras!

Sa Viagra sarong aldaw an day-off sa trabaho; sa Ciales, duwang aldaw na gayo an day-off sa trabaho. Masupog kun maheling na bukol pa an bulsa kan pantalon, daug pa an igwa nin bote nin pomada!

An presyo kan bulong mahal talaga. Mahal na, an pagbakal problema pa. Sa pag-abot botika: salingoy sa wala, salingoy sa too. Nagmamasid kun igwa nin kamidbid. Kun dai nin kabisto, dagos an duhol kan reseta sa nakahuyom na tindera!

Siring sa pagrani sa botika kan sarong gurang na padi sa parokya. Si mamo maski dai naka-sotana midbid kan tindera. Nakiulay na mabakal nin Viagra. Nagsayuma an tindera ta an padi gusgus na, conventual na dai na ngani nagmimisa. Dai pa nin reseta.

Sa kapipirit kan gusgus na padi na haros mangadyi na, pinabakalan nin Viagra kan nakahuyom na tindera.

An purpose palan ni mamo sa pagbakal nin Viagra: tanganing mairayo an turo kan ihi tanganing dai mabasa nin ihi an bagong bakalon na sapatos!