Tubig PIWAD
favorito ni Mayor Bongalonta
PILI, Camarines Sur - Si Alcalde Tomas Bongalonta kan banwaan na
ini iyo na an na-ngengenotan sa mga consumedores kan Pili Water
District (PIWAD) sa pag-inum nin tubig sa pagtindog na mayo kan
sinasabing contaminadong tubig sa saindang banwaan.
Maging an Municipal Health Office (MHO) an dai naman nakakarecibe
nin paciente na tinamaan kan helang na tipos na nakoa sa nainum na
contaminadong tubig.
Sinabi ni Bongalonta na mayo na nin casong tipos sa saindang
banwaan matapos maglakop ini sa 22 kan 26 na mga barangay kan
municipio kan Pili na nakarecord nin nasa 160ng mga paciente.
Nangyari ini kan mga bulan nin Octubre asin Noviembre 2004.
Nagka-igwa na nin conferencia an LGU, DOH asin DENR sa paglinaw na
mayo nang dapat na ika-alarma.
An jefe ejecutivo asin iba pang mga oficiales local digdi kan mga
nakaagi pang bulan nag-iinum nin tubig hali sa PIWAD ini sa
pagtiwala ninda na seguradong malinig na an nakokoang tubig sa
sinambit na water district.
Si General Manager Pol Cunanan kan PIWAD, naglinaw na nagkoa nin
water sample an DOH sa salog na saro sa saindang burabod nin tubig
na dai pa naagi sa water treatment na an resulta sa laboratorio
positivo na contaminado.
Alagad si mga nag-aagi sa water treatment negativo kaya mayo man
dapat na ika-alarma kan mga nakaaging bulan na takot mag-inum nin
tubig kan PIWAD.
Balik na sa normal an consumedores nin tubig, mayo na nin
kahaditan asin mala ngani nahali na si mga halabang pila na
nagbabakal nin mineral water sa centro commercial kan kabesira kan
Camarines Sur.
An tubig kan PIWAD presco pa huli ta kadakli kan saindang
pigkokoanan hali sa saindang burabod nin tubig sa Mt. Isarog
National Park.
