City
Director kan DILG Iriga
sasangatan nin caso
ni Romeo L. Olea at Jimmy Manaog
CIUDAD nin Iriga - Nakatalaan na sangsangon nin maninigong caso
kan mga residentes kan Brgy. San Miguel sa ciudad na ini, sa
pangenot ni dating consejal Angel Nilo Bagamasbad si city director
Ma. Clarissa Sadol kan DILG-Iriga, pagkatapos na ideklara kaining
illegal an ginibong ‘barangay assembly’ kan mga constituentes
nganing huruton na magtagbang na sa pwesto an saindang punong
barangay asin iba pang miembros kan barangay council.
Si Sadol enot nang dai pig-onra an peticion kan mga taga San
Miguel na dai pacobrahon nin honorarium an grupo ni Fermante huli
kan pig-aatubang kan mga ini sa Sangguniang Panlungsod kan Iriga
asin sa oficina kan Ombudsman huli kan mga dai maipaliwanag na
transaccion na nagin causa kun tano ta mayo nin resibo asin cedula
asin mayong minalaog na local revenues sa barangay.
An pagdeklara ni Sadol na illegal an asemblea iyo an ginikanan kan
karibokan kan naka-aging Sabado kan haralion kan grupo ni Fermante
an mga streamers kun haen nakasurat an mga reclamo asin
sentimiento kan mga taga San Miguel arog kan, ‘walang resibo,
walang sedula, kapitan Fermante, magpaliwanag ka’ asin ‘for the
welfare of the people of San Miguel, Fermante et. al. must resign
now.’
Si Bagamasbad, nagsabi na casong pagbalgar sa anti-graft and
corrupt practices act asin ignorance of the law an isusunad niyang
caso contra ki Sadol huli kan pagdeklara kaining ilegal an
assembly mantang ini matoninong asin tinatawan nin garantiya kan
constitucion.
An dating consejal nagsambit kan Article III kan Bill of Rights
Sec. 4, ‘No law shall be passed bridging the freedom of the
speech, of expression or of the press, or the right of the people
to assemble peaceably and petition the government for redress of
grievances.’
