DepEd nag-aandam na sa Bridge Program

AN controvercial na Bridge Program kan Department of Education (DepEd) dawa na ngani pigconsiderar kan panahon ni dating Secretary Edilberto de Jesus na optional alagad ipapadagos giraray sa sunod na school year mala ngani nag-aandam na kan High School Readiness Test (HSRT) sa ika-duwang semana kan Febrero 2005.

Si director Teresita Diaz-Naz nagsabi na mayo man nin bagong memorandum si Secretary Florencio Abad na cacancelaron na an implementacion kaini sa masunod na burokasan nn clase.

Digdi sa Camarines Sur an oficina ni Division Supt. Lucita Año an pigpa-andam na an mga school supervisor sa HSRT.

Si Abad nagpahayag sa prensa na dai niya paman hinahali an Bridge Program na dating pigpasunod ni de Jesus, alagad saiyang pig-eevaluar an programa kun gurano ka-efectivo.

An dai makakapasar sa HSRT an mapipiritan na maglaog man giraray sa pre-high school remedial “bridge” classes.

Sa Camarines Sur National High School sa Ciudad nin Naga, igwang 162 na mga estudiantes an nagpasa-irarum sa Bridge Program. Si OIC Principal Salvacion Selga nagpahayag sa Bicol Mail na mayoria sa mga estudiantes an nagpaheling kan saindang decididong pag-adal nganing dai magbagsak sa mga subjects kan english, math, asin science.

An sinambit na tolong subjects iyo sana an saindang pig-aadalan sa aro-aldaw na pag-clase huli ta ini an pigtawan nin prioridad kan DepEd ta dakul an mga nakakatapos sa mga high school an kulang sa pag-adal sa english asin duwa pang subjects.

Sa report kan oficina central kan DepEd kan nagtalikod na taon sa 1.4 milliones na nagkoa kan HSRT 50% an nagbagsak sa examinacion.