GRO tabang sa turismo - Grageda
AN mga programa sa turismo sa mga Local Government Unit (LGU) saro
sa pigtatawan nin prioridad dai maiibitiran na may dayohan mahanap
nin Guest Relation Officer (GRO) sa mga aling-alingan.
Kun dai na ini itugot kan City Hall “Saro ngani ini sa problema
huli ta sa mga progresibong mga ciudad an mga entertainers normal
naman asin an Ciudad nin Naga progresivo mala ngani inapod na
business friendly kaya dai man ini enterong hahalion”. Ini an mga
pahayag ni Consejal Jose Grageda, mientras na si Alcalde Jesse M.
Robredo an nagfafavor na dai na tugotan digdi an mga GRO.
Baranga pa an mga oficiales local sa pagtubod kan jefe ejecutivo
local na halion na an mga GRO.
An hapot na ni Grageda, pano na an saindang hanap buhay dai man
sinda matawan nin livelihood program kan local na gobierno.
Alagad pigpaliwanag kan consejal na kun ano an magiging decicion
kan mayoriang miembros kan Sanggunian Panlungsod, iyan saiyang
susuportahan.
Mientras tanto, sa ginibong committee hearing kan laws and
ordinance asin public utility committee kan nakaaging Martes na
hapon pinagkasurundoan na maging status na muna an mga permit kan
aling-alingan sa presenti nindang lugar.
Igwa sanang condicion na si harani sa mga escuelahan asin simbahan
ipadagos nalang na kakanan o restaurant.
An City Hall ma-implementar na kan ordenanza na dapat may
distancia nin 100 metros an arin man na mga beer house o
aling-alingan sa mga escuelahan asin simbahan. Ini hali sa dating
200 ginibo nang 100 metros.
Si mga operator kan sinambit na negocio an naghahagad sa
sanggunian na dai muna iimplementar huli ta tikapo na sinda sa
panahon na maghanap nin babalyohan na lugar na dai mabalga sa
bagong ordenanza.
An plano kan ciudad an gabos na mga aling-alingan ibalyo na sa
Diversion road nganing digdi na sinda gabos tiripon mayo nang
reclamo an mga escuelahan.
