Paternity
Leave
AN
PATERNITY Leave iyo an itinataong pitong aldaw na bakasyon na may
suweldo sa trabahador na lalaki na igwa nin agom, sa inot na apat
na veces na pag-aki kan agom, pagkaka-igwa nin miscarriage o
pagkaka-igwa nin abortion.
An Paternity Leave diretso kan mga nagtatrabaho sa sector privado
magin sa gobierno basado sa kasuguan kan Acta Republica 8187 na
poon pa kan Hulyo 5, taon 1996. An trabaho kan lalaki puweding
regular, probational, contractual, o yaon sa project basis.
An babae na nag-aki kaipuhan tunay na agom: legitimate asin bakong
ka-live-in o kabit; kasal sa padi o sa juez, bakong kasal sa banig;
kaibahan na permanente sa harong bakong kasaruan. An Paternity
Leave limitado sana sa sarong agom, dai puwede sa ika-duwa o
ika-tulo. Kun Muslim, puwede seguro.
An pitong aldaw na bakasyon kaipuhan gamiton sa pag-alalay asin
pag-ataman sa agom: pag-alalay sa pag-labor, pagdagos, paghilot
kan makulog na hirog, pagpunas nin ganot, sagkod makakarigos,
tanganing liwat magin makusog asin mahamot. Tabangan sa paglaba
kan lampin, pagpasuso sa aki na parahibi, paghilot sa suso kan ina
na dai linuluwasan nin gatas, pagluto nin masiram na kakanon para
sa bagong mangaki na agom na ngonian seksi na naman!
An bakasyon puweding gibohon bago mag-aki an agom, panahon kun
nag-akki na, o paka-aki na kan agom, basta dai magsobra sa pitong
aldaw an bakasyon. An bakasyon kun dai gamiton, dai puweding
kuwartahon.
Tulos paka-aki kan agom, an birth certificate kan aki darhon sa
upisina. Kun nagka-igwa nin miscarriage o abortion an medical
certificate o death certificate tulos-tulos man i-submit.
Kaya tanganing mabilis an pag-process kan saimong Paternity Leave,
nangingidam pa sana an agom ipaaram na sa upisina an expected date
kan delivery.
Anggot si Mayor ta an saiyang driver na si Nognog, sa trabaho dai
naglalaog. Pinaapod an driver asin hinapot kun tano ta dai
naglalaog. An sabi ni Nognog yaon daa siya sa Paternity Leave!
Ngalas an alcalde ta an saiyang driver soltero asin dai nin agom.
Ano ngonian ta yaon sa Paternity Leave?
An sabi ni Nognog: nagtuga daa saiya si doctora, an empleyada ni
Mayor sa upisina, na bados siya asin dai mahahaloy maaki na!
Itinuga pa daa ni doctora na si Nognog an ama kan omboy na saiyang
dinadara. Kaya, diretso ni Nognog na magbakasyon na basado sa
pagboot kan Paternity Leave.
Nagkurundot na sana an angog ni Mayor asin nagsabi: “Dakulang
eskandalo ini. Igwa palan immorality na nangyayari sa Mayor’s
Office. Kaya, dapat imbestigaron”!
Ngonian, igwa nin imbestigasyon sa municipio tanganing maaraman
kun sairisay pa an igwa nin relasyon. Siring ki doctora asin an
driver na si Nognog!
