Parasalakat kinasohan
By Andy Compuesto
DUWANG mga suspetsado sa nagkapera nang harabonan sa brgy. Caluag,
Ciudad nin Naga an sinangatan nang casong Robbery with Frustrated
Homicide sa corte matapos mabisto na sinda an nagsalakat sa
tiendahan ni Armchel O. San Pascual kan Noviembre 8, 2004.
An City Prosecution Office nagsangat kan sinambit na caso contra
sa mga suspetsado na si Ricardo Chua y Basar kan Urban Poor,
Abella, Ciudad nin Naga, Alvin Buguerras y Correno, kan Lerio St.,
Clupa, Caluag, Ciudad nin Naga asin saro pang John Doe na iyo si
naging “lookout”.
Nagrecomendar nin P100,000 an City prosecution office para sa
temporariong libertad kan mga suspetsado, alagad sagcod sa natapos
an preliminary investigation kan fiscalia sinda padagos pang
nagtatago sa miembros kan awtoridad.
Mga delata asin iba pang producto an nahabon na nagcacantidad nin
P2,000.00.
Si Ma. Lucia V. Ramos iyo an nakaheling kan matangang banggi kan
Noviembre 8, 2004 sa incidente sagcod nang ini magdurolag. Siya
iyo an naging testigo contra sa mga acusado.
An victimang si San Pascual an pinakol pa nin bote sa payo asin
sinaksak pa nin patarum kan mga suspetsado na nagkakarigos nin
dugo matapos saksakon nin nagkaperang veces asin nagdurolag an mga
acusado.
Kan Noviembre 11, 2004, kan siya invitaran ni brgy. capital Vidal
Castillo kan Caluag sa barangay hall nganing bestohon an duwa na
nag-aatubang man nin suhay na casong panghahabon, positivong
pigbisto kan nagrereclamo sinda Chua asin Beguerras na iyo an
naghabon sa tiendahan.
Si Chief of Police Ramon Ranara, nagsugo naman sa saiyang mga
taohan na arestaron na an mga suspetsado huli ta kan nagtalikod na
taon an mga casong harabonan iyo an may halangkaw na numero.
