Patanid ni Ka Roger pigponan na
sa CSur
TOs vs PA, PNP
hinali ni PGMA
APAT na bulan matapos mag-anunciar an CPP/NPA na malansar nin mga
tactical offensives (TOs) sa establismiento militar asin maging
police outposts sa pag-andam sa pagpabagsak kan Arroyo
Administration, naglansar na nin ofensiva sa Camarines Sur.
Sa Minalabac, Camarines Sur saro an gadan asin saro an iredong
miembros kan PNP kan paarak-asakan nin M-16 armalite an lugar na
tuturogan kan grupo ni Chief of Police P/Sr. Inspector Benjamin
España sa brgy. Hamorawon mga ala 1:00 nin maagahon kan Enero 25,
2005.
Si Sr. Supt. Romeo Mapalo, PNP provincial director sa Camarines
Sur nagpahayag na an nangyaring encuentro sa Minalabac PNP parte
na kan mga pahayag ni Ka Roger Rosal na an NPA malansar nin mga
ofensiva ngonian na taon.
Huli kaini, si Mapalo an tolos nagpaluwas nin directiva sa mga
jefe de policia sa 35ng mga banwaan kan Camarines Sur na maging
alerto sa mga kalaban kan gobierno asin dapat maging andam sa ano
man na paghasok nin kariribokan.
An mga victimang polis sinda; PO2 Allan Boaquiña, na tolos
binawian nin buhay mientras na an iredo si PO2 Hermigildo Moreno,
na na-confined sa Mother Seton Hospital.
Si P/Sr. España may mga kaibahan nin siyam na miembros kan PNP
hali sa saindang Police Station na nagtaong seguridad sa
kapiestahan sa barangay Hamorawon, Minalabac kan Enero 24, 2005
alagad kan maagahon kan Enero 25 mientras na maturog na sinda igwa
na palan na naka-abang na mga 20ng rebeldeng NPA na iyo an
nagpaputok nin nagkaperang veces sagcod na enot na tinamaan si
Boaquiña.
Mga decalibreng armas an gamit kan mga NPA sagcod na nagka-igwa
nin pabalyohan nin putok na duwa an mga tinamaan nin bala sa grupo
kan PNP. Nagka-igwa nin joint operation an militar asin PNP sa
paghasog kan mga kalaban kan gobierno na sagcod kan Martes (Enero
25) na hapon mayo naman nin resulta an saindang operacion.
Nasa 30 kilomentros an distancia kan sinambit na barangay hali sa
centro kan banwaan nin Minalabac, rulobak-lobak pa an mga tinampo
kaya dificil an transportacion na makaabot tolos sa barangay.
Si Mapalo, nagsabi na an katuyohan kan policia sa sinambit na
barangay iyo an pagmantenir kan pace orden, alagad inatake pa kan
mga NPA na mayo man nin validong rason.
Nagpatanid an jefe kan PNP sa Camarines Sur sa mga rebelde na
andam sindang makisabayan sa laban bakong sa talikod na laban.
Si Alcalde Gil Basmayor, nagsabi na an saindang banwaan matuninong
na lugar asin kun igwang nangyaring encuentro iyan bibihira sana
na mayo man dapat ipaghadit sa pace orden sa saindang banwaan.
An LGU Minalabac an nagtao na nin asistencia financial sa mga
victimang polis.
Antes nangyari an incidente sa Minalabac, si Mapalo an nagpaapod
na nin command conference sa mga jefe de policia na an saro sa
nabukasan na problema iyo an mga nasisiripan na mga armadong NPA
sa nagkapera nang mga barangay.
An problema sa insurgencia iyo man giraray an nagdadanay sa
Camarines Sur kaya ngani igwa nang pagtarabangan an Philippine
Army asin PNP, sabi pa kan provincial director.
Matapos kan confirmacion sa incidente sa sinambit na banwaan sa
entrevista kan media ki Ka Roger, sinabi kaini na siya namumundo,
alagad ini parte kan civil war na nagiging maisog an saindang
tropa sa pagtumba kan miembros kan militar asin PNP.
Si Bikol PNP regional director Restituto Mosqueda, nagvisita na
kasoodma ki Moreno sa hospital asin sa burol ni Boaquiña.
