---

3ng parasalakat dakop na kan PNP

PILI, Camarines Sur - Apat na mga suspetchado sa pagsalakat sa residencia kan sarong negociantes sa barangay San Isidro digdi an sinangatan nang casong Robbery with serious physical injury sa corte matapos madakop an tolo sa mga suspechado kan policia 24 oras pagkatapos kan crimen.

An mga suspetchado sinda Richard Sesmundo, Armando Silva, Renato Pelia asin an saro na padagos pang nagtatago sa miembros kan awtoridad dai na muna pigsambit an pangaran.

Si Chief of Police Benito Niño nagsabi na naging madali an pagkakadakop kan tolo sa apat na suspetchado huli ta nakalansar tolos sinda nin operacion pakatapos kan incidente mg alas 8:00 nin banggi kan Domingo (Julio 10) kan marikas man si pagpaabot nin sombong sa Police Station kan victima.

An victimang negociante si Edwin Velarde, kan salakaton an saindang residencia kan armadong suspechado tinutokan nin calibre 45 kan saro sa apat na padagos pang pighahanap asin pigtutubodan nagtatago pa sa Minalabac.

Binadil pa sa abaga si Velarde asin si iba pang mga pag-iriba sa familia an pigtutokan nin badil. An victima an tolos man pigdalagan sa hospital sa Ciudad nin Naga asin salbado naman an saiyang buhay.

Nabisto sa atubangan kan mga awtoridad an mga nagkadarakop, alagad padagos pang nagpapahimotik. An tolo pigbalyo na sa BJMP district jail sa Brgy. Del Rosario, Ciudad nin Naga.

Sa investigacion kan policia, sinabi pa ni Niño nakoa sa victima iyo an cantidad na P190 mil na cash asin cellphone.

“Inside job” an caso huli ta an saro sa suspechado si Richard Sesmundo, iyo an boy sa residencia kan negociante sa barangay San Isidro iyo an na enot na naglaog sa harong nagsunod si iba pa kaining mga pag-iriba sagcod na tinutokan an mga familia mientras na binadil si Edwin.

Si Silva, iyo an maysadiri kan trimobile na may body number 1396 na registrado sa Ciudad nin Naga asin ginamit sa pagdulag kan mga suspechado. An bayawon kaini na iyo an nagpaputok kan badil iyo an dai pa nadadakop kan policia.

Mientras tanto, si OIC Mayor Ronald Boclot an nagpalayog man nin pag-omaw sa Pili Police Station huli kan pagkakaresolver tolos kan caso sagcod na matalikop tolos an mga responsable sa sinambit na crimen.