BFAD nagpatanid sa mga feken
Johnson's product
AN
BFAD sa Camarines Sur pig-alarma na an mga consumedores sa
provincia na maglikay sa pagbakal nin fekeng Johnson’s product na
enot nang naglakop sa Bato, Catanduanes asin pigsasabi na may
oficina an compania kan Oakwood Enterprises sa national highway sa
Pili, Camarines Sur.
Pigverificar na kan BFAD sa oficina ni Alcalde Tomas Bongalonta,
Jr. an oficina kan Oakwood Enterprises sa saiyang banwaan, alagad
sa investigacion ni Municipal Administrator Romulo Carido mayo man
sinda pigtawan nin business permit sagcod na dai man ngani nag-eexister
an sinambit na compania sa municipalidad kan Pili.
Kan Julio 8, 2005 nagreclamo si Rudy delos Santos kan Bato,
Catanduanes sa oficina ni Fermin Joel Bagadion, Jr. an Food and
Drug Regulation Officer kan BFAD sa provincia nin Catanduanes
matapos makabakal sinda nin baby powder kan Johnson’s product na
malaen an parong asin pigtutubodan na fekeng producto.
An sombong nagsasabi na an Oakwood Enterprises nagdidistribuir nin
baby cologne, baby oil, baby lotion na risang ibang klase kaya
ngani pigpaabot an reclamo sa oficina kan BFD.
An agente maydarang roving van na iyo an ginagamit sa pagpapabakal
kan sinambit na mga producto.
Si Bagadion, tolos man pig-alerto an oficina provincial kan BFAD
sa Camarines Sur huli ta igwang address kan oficina sa national
highway kan Pili, Camarines Sur. Alagad kan verificaron mayo man
an sinambit na oficina maging mayo man nganing record sa LGU Pili
na nagkoa kan saindang business permit.
Napag-araman na an oficina regional kan BFAD sa Bicol an nag-alerto
na sa iba pang mga oficina kan sinambit na agencia nganing i-monitor
asin ipasabot sa publico na maglikay sa pagbakal kan sinambit na
fekeng producto.
