Bicol Peace Caravan binagat kan
PNP, PA, TMG
Mga raliyista
vs GMA dai nakaabante sa Makati
SIPOCOT, Camarines Sur - “Sobra pa sa Martial Law” an ginibong
dai pagtugot kan Municipal Police Station kan Sipocot asin
miembros kan Philippine Army, Traffic Management Group sa Bicol
Peace Caravan for Justice pasiring sa Manila kan Martes (12) na
maagahon ngani sanang dai makaparticipar sa dakulang protest rally
kasoodma sa Ciudad nin Makati sa paghurot na magtagbang na sa
puesto si Presidente Gloria Macapagal- Arroyo.
Si Bevelry Quintillan lider kan Bicol Peace Caravan nagsabi na
malinaw na pagbalga sa saindang constitutional right mientras na
dai man binabawal an pag-viaje asin asemblia kaya an saindang
Abogado an nag-aandam nin caso contra sa PNP asin militar.
Maabot sa 30ng jeepney hali sa anom na provincias kan Kabikolan
asin igwa pang hali sa Visayas na lunad nin mga militanteng grupo
asin iba pang mga sectores an binagat kan PNP, TMG asin militar sa
Sipocot kun ano anong hinahagad na mga papeles sa pag-viaje
pasiring sa Manila apesar na igwa na sinda nin special travel
permit gikan sa Land Transportation Office.
Si Sr. Supt. Romeo Mapalo, PNP Provincial Director sa Camarines
Sur nagsabi na igwang directiva an saindang higher command na
maconducir nin inspection sa mga sasakyan asin an posibleng
pagsabay kan mga terorista na puedeng maghasok nin kariribokan sa
rally sa Makati City kasoodma kaya naging estricto an awtoridad.
An nagbagat na mga awtoridad pinapundo an mga jeepney na lunad an
mga maparticipar sa rally huli kan acusacion na may mga dara nin
armas, alagad mayo man nakoa envez mga darang pagkakan arog kan
bagas, tuyo, gulayon asin iba pang mga balon sa pagn-andam dawa
perang aldaw sinda sa tinampo sa pag-protesta.
An Gloria Resign Movement (GRM) iyo an pigtutubodan kan mga
raliyista an naging motivo na dai sinda tugotan na mag-abante
pasiring sa Makati City sagcod na igwang directiva hali sa
Malacañang.
Si Alcalde Mameng dela Peña kan Sipocot kan makaolay kan BM
nagsabi na pig-aram niya an dahilan ki Chief of Police Baluyot kan
Sipocot Police Station kan padagos na pagpugol kan mga raliyista.
An report sa saiya na igwang instruccion sa sainda si Bicol PNP
Regional Director Victor Boco asin kan oficina ni Mapalo na dai
paabantihon pasiring sa Makati City an mga ma-protesta laban ki
GMA.
Kan bangging Martes an Caravan for Peace nag-gibo na sana kan
saindang protest rally sa Sipocot asin pagdenuncia sa padagos na
pagtenir sa puesto ni GMA apesar na mayo na nin credibilidad asin
integridad.
Sa atubangan kan ginigibo nindang pag-vigil an mga militar asin
PNP an padagos na nakapalibot sa sainda pig-kokoanan nin mga
retrato sa pagsahot na igwang mga miembros kan CPP/NPA an kabali
sa mga ma-rally pasiring sa Manila.
Mientras tanto, si Roger Rosal, alias Ka Roger an nagcondenar sa
naging accion kan militar laban sa mga raliyista. Pigpahimotikan
kaini an mga acusacion sa saiya kan militar na maghahasok nin
kariribokan an NPA asin kabali sa mga ma-protesta.
Dai kami nakiki-aram sa mga protest rally sainda iyan na deretso
dai man dapat sahotan nin mga balubagi an saindang movimiento,
sabi pa ni Ka Roger.
Mientras tanto, pigcuestion ni PD Romeo Mapalo kan PNP provincial
office kan Camarines Sur an pagparticipar kan sarong German
national na si Ms. Maria Struce na naging activo sa pagkurahaw na
magdemiter sa puesto si GMA.
Pig-report ni Mapalo sa district office kan BID nganing
investigaran an presencia ni Struce sa Bicol caravan.
