---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”



Garapal

Garapalan palan kun mina-maniobra an resulta can eleccion,
Ta kasabwat an oficiales kan COMELEC asin halangkaw na pamayo can nacion.
Sinda an nagba-basang-basang kan sagradong sufrayo kan banwaan,
Kaya nawawara an confianza sa gobierno kan nama-manwaan.

Dahil sa kapaslo-an sa poder, yaman, asin kapangyarihan;
Mga suwetik na politico, riniribayan an resulta kan borotohan!
May sa-long sa dongo an mga taga-COMELEC kun sinda mina-desisyon,
Dakul an anomalia, may kaduda-dudang credibilidad na institution.

Wala to-o an mga proyectong pig-implementar na poros palpak.
Dai man nakinabangan, nalugi pa nin BILYONES na perak!
Pinamamayuhan kaya ini ni Ben Abalos na garo palos magpalosot;
Mga con-missioners arog ki Garcillano asin Barcelona na mga
batikano sa dagdag-bawas ballot!

Makosog an boot ni Garci ta an kaolay poderoso man,
Maku-confirmar daa ini sa puesto basta “tabangan” si M’am.
Kaya kun minagamit nin poder garo mayo nin kagadanan,
Sobra an pagka-arogante, an pagdaya hayag nang garapalan!