Sa higot na pang-apudan kan kadaklan na si Gloria Macapagal-Arroyo, “por la patria”, mag-resign na, an sabi ni Gloria: “Ano kamo sineswerte”?.!

Kaya ngani daa siya nagdaya sa tabang ni Garci tanganing magin presidente. Saka ngonian na presidente na: basta ma-resign!

Ano kamo sineswerte?

“No way”, sabi pa kan mataray na babae. Magputi na an uwak, mag-itom na an talaod: “Dai ako ma-resign”, dagdag pa ni GMA.

An siisay man (kono) na igwa nin reklamo, magdulok na sana sa kongreso. An mga tuta ni Gloria naghahalat saindo duman sa kongreso.

- o0o -

Nag-sorry na; nag-apologized na; naghagad pa nin tawad. Dai pa guiraray kamo kuntento. “Ano na sana an gigibuhon ko”?, sabi ni GMA.

Mag-resign ka na ngani.

Sabi ni Susan ki Gloria: “You had stolen the presidency not once but twice. For all you know, an putikon tugang nin parahabon!”

Sabi man ni Gloria ki Susan: “Inggit ka lang Inday. Maski thrice pa gigibuhon ko. Nagsiram na baga an mag-istar sa Malakanyang. Maski na apudon akong parahabon basta an hahabunon Palasyo Malakanyang!”

Hinurot man ni Tita Cory na si GMA mag-sakripisyo: maghilig na sa puwesto!

An sabi ni GMA: “No way. Ano ka sineswerte?”.

Mantang si Tita Cory asin Susan sibot sa pagpahali ki Gloria, si Kris Aquino garo sana mayo nin pakilabot. Si Kris sibot sana ki James Yap asin sa paghapot: “Pilipinas, game ka na ba?”.

Lo mismo an mga Obispo nagsayuma na makiaram. Bako daang problema kan simbahan an pag-resign ni Gloria sa Malakanyang!

- o0o -

Sobra na (kono) an sakripisyo na ginigibo kan pamilya Arroyo. Si Mike Arroyo, an first gentleman, nagpa-exile na sa San Francisco kaibahan ang saiyang number two. Si Mikey nagbakasyon grande na sa kongreso. An ama asin aki dai nang nakukuang jueteng payola ta nagpundo na sa pag-gugo nin jueteng sa Pampanga si Bong Pineda.

Saka ngonian hahalian pa siya nin trabaho. “Tama na, sobra na,” kurahaw ni Gloria.

Sabi pa kan Presidente: nagsusuba (kono) siya kan sabihan an mga cabinet secretary na mag-resign. Nag-resign man!

Mga uto-uto (kono). Sorry, may karibay na daa kamo. Kutana, the best economic team. Mga miyembro pa kan civil society sa Malakanyang!

Pero dai bale. An gutom sa poder na mga agom kan mga tuta sa Kongreso nagka-igwa man nin trabaho. Kaya kun siisay an boot pang mag-resign, mag-resign na.

Alagad si Gloria Macapagal-Arroyo: dai ma-resign. Herak man kan banwaan!
Ano kamo sineswerte?