---

NFA rice bakong efectivo sa mercado

PILI, Camarines Sur - An National Food Authority (NFA) nagpapatubod sa consumedores na sinda an nakaka-pugol kan paglangkaw kan precio kan mga commercial rice, iyan sagcod sana sa informacion kan sinambit na agencia dai sinda naglilibot sa mga mercado naglangkaw na an precio kan bagas nagsakat na sa P24.00 cada kilo.

Na-enot kaini an NFA regional office nagsabi na bastante an supply nin bagas sa mga bodega kaini matapos mag-abot an mga imported rice sa region Bicol.

Si NFA Provincial Manager Edmundo V. Enriquez nagsabi na bastatne pa an NFA rice sa Camarines Sur asin padagos an pagbariwas kaini sa mga awtorisadong NFA Store kabali na sa Ciudad nin Naga.

Katuyohan nganing maging establi an precio kan commercial rice mientras na an precio kan bagas kan NFA cantidad sanang P16.00 cada kilo.

Afuera kan presente nindang imported rice igwa pa sindang local na producto na pinapabakal man sa baratong precio. An hapot na ngonian kan mga consumedores yaon sain an pigsasabing NFA rice kulang ngani an supply kaini sa mga mercado kaya ngani dai man napupugolan an padagos na paglangkaw kan precio kaini.

Sinabi pa ni Enriquez na padagos an saindang distribucion kan NFA rice sa manlaen-laen na municipio kan Camarines Sur sagcod kan pagluwas kan saindang rolling store.

Dai man naging efecto an sinambit na agencia nganing maging establi an precio kan mga commercial rice apesar kan report na padagos na nag-aabot an mga imported rice. Huli kaini, duda an ibang mga consumedores na igwang negociante an nakikinabang kan supply nin bagas kan sinambit na agencia.