SP nagsabay na sa GMA resign
SARONG
aldaw matapos magpaluwas nin panindugan an Catholic Bishop
Conference of the Philippines (CBCP) sa pag-gilid nin suporta sa
pagpademiter sa puesto ki Presidente Gloria Macapagal-Arroyo, dai
man ini naka-influencia sa mga miembros kan Sanggunian Panlungsod
envez kina-agahan kan Lunes (Julio 11) nagpasar nin resolucion sa
paghagad na dapat maghelig na sa puesto an presidente.
Nakapasar an resolucion na pigpadrenohan ni Consejal John G.
Bongat, baranga an miembros kan sanggunian dai nakakoa nin
solidong suporta huli ta igwa man giraray nagsusuporta na agihon
sa “rule of law” mala ngani apat si favor asin apat man si contra
kaya ngani an nagbari kan tabla iyo si bise alcalde Gabriel
Bordado, Jr. an presiding officer.
Sa internal rules kan sanggunian kun tabla an resulta kan division
of the house an presiding officer iyo an kaipuhan na mag-bari kan
parejong numero nin voto.
An mga nagvoto afavor sinda consejales: John Bongat, Salvador del
Castillo, Cecilia de Asis asin Jose Mari Mercado. Si mga nagcontra
kinababalihan ninda Miles Raquid Arroyo, Julia Lavadia, Jr.,
Esteban Abonal asin Lourdes Asence.
An mga nag-binabahe si Jose Grageda asin Allen Reondanga mientras
na si William del Rosario an nagpalibre awsente sa sinambit na
session regular.
Mayo na nin credibilidad asin integridad si GMA bilang lider
nacional matapos akoon niya an pagkaka-envuelto sa wiretapped
conversation sa sarong halangkaw na oficial kan Comelec na
pigtutubod si Commissioner Garcillano sa kainitan kan ginigibong
canvassing nin mga voto kan nakakaging presidential elections.
Ika-tolo nang pag-provar ni Bongat na ipadagos an pagpalusot kan
propuestong resolucion sagcod na nagpaapod pa ngani sinda nin
public hearing na mayoria sa mga nag-atendir an nagfavor sa
resolucion.
Nakaatid-atid an ibang miembros kan Sanggunian Panlungsod na
sainda nang suportaran an sinambit na resolucion matapos
magdemiter an sampolong mga miembros kan gabinite ni Presidente
Arroyo. Nagsunod digdi iyo an pagluwas nin pangapodan ni dating
Presidente Corazon Aquino sa paghagad ki GMA na magsacrificio asin
maghelig na sa puesto nganing maibitiran pa an mga kariribokan
huli sa crisis sa politica.
An mga oficiales local kan Ciudad nin Naga na-elihir sa lindong
kan partido liberal (LP) kaya ngani sinda nagsunod man sa decicion
kan mayoria sa mga lideres kan LP sa pamamayo ni Senate President
Franklin Drilon na nagsuporta na sa Gloria Resign, sabi kan saro
sa miembro kan sanggunian na habo nang magpasambit kan saiyang
pangaran.
An simbag man kan nagpadreno kan resolucion, mayo pa navoces si
Mrs. Aquino asin si Drilon, andam na an saiyang resolucion na-ulang
sana huli kan nag-aalangan pa an ibang mga consejales.
Si Alcalde Jesse M. Robredo na iyo an huring mafirma kan
resolucion an nagpahayag na sa media na favor siya na maghelig na
sa puesto si GMA.
